बरुण हाइड्रोपावरको शतप्रतिशत हकप्रद शेयर निष्काशन, साउन १९ सम्म आवेदन दिन सकिने

काठमाडौं । बरुण हाइड्रोपावर कम्पनी लिमिटेडले आजदेखि हकप्रद शेयर निष्काशन तथा बिक्री खुला गरेको छ। कम्पनीले हाल कायम चुक्ता पूँजीको १०० प्रतिशत अर्थात् १:१ अनुपातमा हकप्रद शेयर जारी गर्न लागेको हो।

यो अनुसार, हालको एक कित्ता शेयरको सट्टामा थप एक कित्ता नयाँ शेयर लिन सकिनेछ। कम्पनीले कुल ५३ लाख ५८ हजार १५० कित्ता हकप्रद शेयर निष्काशन गर्दैछ, जसको अंकित मूल्य प्रतिकित्ता १०० रुपैयाँ छ। कुल हकप्रद निष्काशन रकम ५३ करोड ५८ लाख १५ हजार रुपैयाँ बराबर हुनेछ।

यस प्रयोजनका लागि कम्पनीले जेठ २२ गते बुकक्लोज गरेको थियो। त्यसअघिको दिन, अर्थात् जेठ २१ गतेसम्म नेप्सेमा शेयर खरिद गरी नाम दर्ता गरेका लगानीकर्ताले यो हकप्रद शेयरमा आवेदन दिन सक्नेछन्। आवेदन दिने अन्तिम म्याद साउन १९ गतेसम्म निर्धारण गरिएको छ।

यस हकप्रद शेयर निष्काशनको बिक्री व्यवस्थापन आरबिबि मर्चेन्ट बैंकिङ्ग लिमिटेडले गरिरहेको छ।