भारतका उपराष्ट्रपति जगदीप धनखडले दिए राजीनामा
काठमाडौं । भारतका उपराष्ट्रपति जगदीप धनखडले स्वास्थ्य कारण देखाउँदै पदबाट राजीनामा दिएका छन्। उनको राजीनामासँगै नयाँ उपराष्ट्रपति चयनको प्रक्रिया सुरु हुने भएको छ।
धनखडले सोमबार साँझ राष्ट्रपति द्रौपदी मुर्मुलाई पठाएको राजीनामा पत्रमा स्वास्थ्यलाई प्राथमिकता दिँदै र चिकित्सकीय सल्लाहको पालना गर्दै, भारतको संविधानको धारा ६७(क) बमोजिम तत्काल लागू हुने गरी उपराष्ट्रपतिको पदबाट राजीनामा दिएको उल्लेख गरेका छन ।
७४ वर्षीय धनखड सन् २०२२ को अगस्टमा उपराष्ट्रपति बनेका थिए। उनको कार्यकाल सन् २०२७ सम्म रहने तय थियो। उपराष्ट्रपति हुँदा उनले राज्यसभा सभामुखको भूमिका पनि सम्हालेका थिए।
उपराष्ट्रपति बन्नुअघि धनखड पश्चिम बंगालका राज्यपाल थिए। उनका पूर्ववर्ती एम। वेंकैया नायडु भाजपा अध्यक्ष तथा मोदी सरकारका मन्त्रीसमेत थिए।
धनखड भारतका तेस्रा उपराष्ट्रपति हुन् जसले कार्यकाल नपुगी राजीनामा दिएका छन्। यसअघि भी। भी। गिरि र आर। वेंकटरमणले राष्ट्रपतिको निर्वाचनमा उम्मेदवारी दिन उपराष्ट्रपति पदबाट राजीनामा दिएका थिए।
नियम अनुसार, छ महिनाभित्र नयाँ उपराष्ट्रपतिको निर्वाचन सम्पन्न गर्नुपर्नेछ। उपराष्ट्रपति नहुँदासम्म राज्यसभा उपाध्यक्षले सभाको कार्य सञ्चालन गर्नेछन्।
धनखडको राजीनामा सत्तारूढ भारतीय जनता पार्टी (भाजपा) नेतृत्वको राष्ट्रिय प्रजातान्त्रिक गठबन्धन (एनडिए) का लागि अप्रत्याशित बन्यो। अहिले लोकसभा र राज्यसभा सदस्यहरू मिलाएर बन्ने उपराष्ट्रपति निर्वाचन मञ्चमा एनडिएको स्पष्ट बहुमत रहेको छ। निकट भविष्यमा गठबन्धनले नयाँ उम्मेदवारबारे छलफल गर्ने अपेक्षा गरिएको छ।
