अर्थ मन्त्रालयको एक्सनपछि रिलायन्स स्पीनिङ उपर सेबोनले गठन गर्यो छानबिन समिति
काठमाडौं । रिलायन्स स्पीनिङ मिल्सको शेयर बुक विल्डिङ्ग प्रक्रियाबाट निष्कासन गरेको साधारण शेयर (आइपीओ)को विषयमा छानबिन समिति गठन भएको छ ।
नेपाल धितोपत्र बोर्डले बोर्डका सदस्य विनोद कुमार भट्टराईको संयोजकत्वमा ३ सदस्य छानबिन समिति गठन गरेको छ ।
सदस्यमा बोर्डकै सदस्य आनन्द राज शर्मा वाग्ले र पिताम्बर भण्डारी रहेका छन् । आवश्यकता अनुसार अन्य व्यक्तिलाई समेत आमन्त्रित गर्न सक्ने बोर्डले जानकारी दिएको छ । आज बोर्डले गरेको निर्णय अनुसार समिति गठन भएको हो ।
समितिले १५ दिन भित्र छानबिन गरी प्रतिवेदन पेस गर्नु पर्ने समय सीमा दिएको छ ।
रिलायन्सको विषयमा छानबिन गर्ने अर्थ मन्त्रालयले नेपाल धितोपत्र बोर्डलाई पत्र लेखेको थियो । मन्त्रालयले लिएको एक्सनका कारण बोर्डले समिति गठन गरेको हो ।
मन्त्रालयले रिलायन्सको शेयर बुक बिल्डिङ्ग प्रक्रियाबाट निष्काशन गर्ने सम्बन्धमा भएका काम कारबाही वा त्यहाँका अन्य विषयहरूमा मन्त्रालयको ध्यानाकर्षण भएको पत्रमा उल्लेख छ । पत्रमा विभिन्न सञ्चार माध्यममा प्रकाशित समाचारलाई उपर पनि मन्त्रालयको ध्यान गएको बताइएको छ ।
उजुरी समेत मन्त्रालयमा परेको बोर्डलाई पठाएको पत्रमा उल्लेख गरिएको छ । ‘संलग्न उजुरी समेतमा उठाएका विषयहरू सम्बन्धमा छानबिन गरी आवश्यक कारबाही गर्नुहुन र सो जानकारी मन्त्रालयमा पठाउनु….’ मन्त्रालयले बोर्डमा पठाएको पत्रमा भनिएको छ ।
उक्त पत्र राजश्व सचिव स्तरको निर्णय अनुसार भएको हो । पत्रमा मन्त्रालयका शाखा अधिकृत नरेन्द्र कुमार कार्कीले काटेका छन् ।
