अब डीभी भरेर अमेरिका जान नपाइने, ट्रम्पले स्थगित गरे ‘डाइभर्सिटी भिसा’ याेजना
काठमाडाैं । अमेरिकाले ग्रिन कार्ड लटरी योजना (डीभी लटरी) बन्द गरेकाे छ ।
गत हप्ता ब्राउन विश्वविद्यालयमा भएको सामूहिक गोलीकाण्डमा दुई जनाको मृत्यु भएपछि राष्ट्रपति डोनाल्ड ट्रम्पले अमेरिकी ग्रिन कार्ड लटरी योजना स्थगित गरेका हुन् ।
सन्दिग्ध व्यक्ति पोर्चुगलका नागरिक थिए, जो बिहीबार मृत अवस्थामा फेला परेका थिए। उनी २०१७ मा डाइभर्सिटी लटरी आप्रवासी भिसा कार्यक्रम मार्फत अमेरिकामा प्रवेश गरेका थिए भने उनलाई ग्रीन कार्ड प्रदान गरिएको थियो।
होमल्यान्ड सेक्युरिटी सचिव क्रिस्टी नोएमले ट्रम्पको निर्देशनअनुसार यो भिसा योजना रोकिएको बताउँदै यस विनाशकारी कार्यक्रमका कारण अब कुनै पनि अमेरिकीलाई हानि नहोस् भन्ने सुनिश्चित गर्न यस्तो कदम चालिएको बताइन्।
अमेरिकी अधिकारीहरूका अनुसार सन्दिग्ध ४८ वर्षीय क्लाउडियो नेभेस भालेन्तेले यसै हप्ता पोर्चुगली म्यासाचुसेट्स इन्स्टिच्युट अफ टेक्नोलोजी (एमआईटी) का प्राध्यापक नुनो लुरेइरोको पनि हत्या गरेको विश्वास गरिएको छ।
यो कार्यक्रममार्फत अमेरिकामा आप्रवासनको दर कम भएका देशहरूबाट आएका आवेदकहरूमध्ये यादृच्छिक छनोट प्रक्रियाबाट हरेक वर्ष अधिकतम ५० हजार भिसा उपलब्ध गराइन्छ।
अमेरिकी ग्रीन कार्ड लटरी योजना (डाइभर्सिटी भिसा) कानुनी रूपमा १९९० को अमेरिकी आप्रवासन ऐनबाट पारित भएको थियो भने व्यवहारिक रूपमा सन् १९९५ देखि लागू भएको थियो ।
यस योजनामा नेपाल, भूटान, बंगलादेश, श्रीलंका, अफगानिस्तान, म्यानमार, अधिकांश अफ्रिकी देशहरू, धेरै युरोपेली देशहरू र केही मध्य एसिया र दक्षिण अमेरिकाका देशहरू समेटिएका थिए । यद्यपी योग्य देशको सूची हरेक वर्ष परिवर्तन हुँदै आएका छन् । योग्य र अयोग्यका आधारमा यी देशहरू समेटिदै आएका थिए ।
