नयाँ वर्षको सुरुवातमा नेप्सेमा उत्साह, साताभर ३६ अर्बको कारोबार

काठमाडौंं । नेपाली पुँजी बजारका लागि यो साता निकै उतारचढावपूर्ण तर सकारात्मक रह्यो । अघिल्लो वर्षको अन्तिम कारोबार दिन अर्थात २०८२ चैत २७ गते शुक्रवार २८२८.७८ विन्दुमा रहेको नेप्से परिसूचक यो साताको अन्तिम दिन शुक्रबारसम्म आइपुग्दा सामान्य वृद्धिका साथ २८३८.४० विन्दुमा कायम भएको छ ।

नयाँ वर्ष २०८३ को आगमनसँगै बजारमा लगानीकर्ताको सक्रियता निकै उत्साहजनक देखिएको छ । यस साता वैशाख १ गते नयाँ वर्षको सार्वजनिक विदाका कारण शेयर बजार बन्द रहे पनि बाँकी चार कारोबार दिनमा अर्बौंको कारोबार भएको छ । अघिल्लो वर्षको तुलनामा समग्र बजार परिसूचकमा ०.६२ अंकको झिनो सुधार देखिएको छ ।

अर्बौंको कारोबार र औसतको स्थिति
यस साता शेयर बजारमा कारोबार रकमका हिसाबले निकै ठूलो उपलब्धि हासिल भएको छ । साताभरमा कुल ३५ अर्ब ९७ करोड ६१ लाख ३६ हजार ३४५ रुपैयाँ १० पैसा बराबरको शेयर खरिद–बिक्री भएको छ ।

यो कारोबार रकमले बजारमा तरलता र लगानीकर्ताको मनोबल उच्च रहेको संकेत गर्दछ । यस साताको दैनिक औसत कारोबार रकमलाई हेर्दा ७ अर्ब १९ करोड ५२ लाख २७ हजार २६९ रुपैयाँ रहेको देखिन्छ ।

शेयर संख्याका आधारमा यस साता कुल ८ करोड ५४ लाख ९ हजार ९२६ कित्ता शेयरको कारोबार भएको छ । जसको दैनिक औसत १ करोड ७० लाख ८१ हजार ९८५ कित्ता हुन आउँछ । साताभरमा विभिन्न ३४४ वटा सम्म कम्पनी (स्क्रिप्स) हरुको कारोबार भएको छ ।

समग्रमा, बजार परिसूचकमा ठूलो अंकको वृद्धि नदेखिए पनि कारोबार रकममा आएको बढोत्तरीले बजार परिपक्व बन्दै गएको विश्लेषण गर्न सकिन्छ ।

उतारचढावपूर्ण चार कारोबार
यस साताको बजार यात्रालाई दैनिक रुपमा हेर्दा पहिलो कारोबार दिन (सोमबार, अप्रिल १३) नेप्से परिसूचक ४.१८ अंकले घटेर २८३३.६० विन्दुमा बन्द भएको थियो । उक्त दिन ८ अर्ब ६६ करोड ५५ लाख भन्दा बढीको कारोबार भएको थियो ।

मंगलबार (वैशाख १ गते) नयाँ वर्षको विदाले बजार बन्द रह्यो । साताको दोस्रो कारोबार दिन बुधबार (अप्रिल १५) भने बजारमा उल्लेख्य सुधार देखियो । जहाँ नेप्से ३३.२७ अंकले बढेर २८६६.८७ विन्दुमा पुग्यो र साताकै उच्च १० अर्ब ५३ करोड ७० लाख रुपैयाँ बराबरको कारोबार भयो ।

यद्यपि यो उत्साह बिहीबारसम्म कायम रहन सकेन । बिहीबार (अप्रिल १६) बजारमा ३३.८३ अंकको गिरावट आउँदा नेप्से पुन: २८३३.०३ विन्दुमा झर्न पुग्यो । सो दिन ९ अर्ब ३१ करोड २८ लाख रुपैयाँको कारोबार भएको थियो ।

साताको अन्तिम कारोबार दिन शुक्रबार (अप्रिल १७) भने बजारले पुन: लय समात्ने कोसिस गर्‍यो । शुक्रबार नेप्से परिसूचक ५.३६ अंकले बढेर २८३८.४० विन्दुमा बन्द भएको छ ।

अन्तिम दिन ७ अर्ब ४६ करोड ६ लाख रुपैयाँ बराबरको शेयर कारोबार भएको छ । जसमा १८,०६३,७२८ कित्ता शेयर ९६,५७३ वटा कारोबार मार्फत खरिद–बिक्री भएका छन् ।

समग्रमा यो साता बजारले २८०८.०२ को न्युन विन्दु र २८७९.२१ को उच्च विन्दुलाई छोएको देखिन्छ ।