भारतीय बजारमा सहकार्य गर्दै होन्डा र निसान, नयाँ प्रविधि भित्र्याउने तयारी
जापानी कार निर्माता कम्पनीहरू ठूला मर्जरभन्दा लक्षित सहकार्यतर्फ आकर्षित भइरहँदा होन्डा र निसानले लागत घटाउन र नयाँ प्रविधिको विकासका लागि भारतीय बजारमा रणनीतिक साझेदारी गर्ने सम्भावना बढेको छ।
काठमाडौँ । विश्वव्यापी रूपमा सवारी साधन उद्योगमा प्रविधिको तीव्र विकास र बजारको प्रतिस्पर्धा बढेसँगै जापानी कार निर्माता कम्पनीहरूले आफ्नो रणनीतिमा परिवर्तन गर्न थालेका छन्।
पूर्ण रूपमा कम्पनी गाभ्ने अर्थात् मर्जर गर्ने महत्त्वाकांक्षालाई थाती राख्दै उनीहरू अचेल निश्चित क्षेत्रमा मात्रै केन्द्रित भएर सहकार्य गर्नेतर्फ आकर्षित भएका छन्। यसै क्रममा होन्डा र निसानले भारतीय बजारलाई आफ्नो नयाँ प्राविधिक गठबन्धनको केन्द्र बनाउन सक्ने सङ्केतहरू देखिएका छन्।
निसान मोटर्सका प्रमुख कार्यकारी अधिकृत (सीईओ) इभान एस्पिनोसाले भारतमा आफ्नो पुरानो साझेदार रेनोबाहेक अन्य विकल्पहरूमा पनि काम गर्न कम्पनी खुला रहेको बताए। उनले भारतमा रेनोसँग बलियो साझेदारी रहे पनि बजारको माग र प्रविधिको आवश्यकता अनुसार होन्डासँग सहकार्य गर्ने सम्भावनालाई नकारेका छैनन्।
हाललाई निसान र होन्डाबीच उत्तर अमेरिकी बजारमा मात्रै सहकार्य केन्द्रित भए पनि भविष्यमा दुवै पक्ष तयार भएमा अन्य क्षेत्रमा पनि साझेदारी विस्तार गर्न सकिने उनको भनाइ छ।
प्रविधि साझेदारीको लक्ष्य
भारतीय अटोमोबाइल बजार मूल्यप्रति निकै संवेदनशील मानिन्छ। त्यसैले दुवै कम्पनीका लागि यहाँ सञ्चालन लागत घटाउनु मुख्य चुनौती बनेको छ। होन्डाले पनि भारतीय बजारमा आफ्नो खर्च कम गर्न र नयाँ प्रविधि भित्र्याउनका लागि केही समयदेखि उपयुक्त साझेदारको खोजी गरिरहेको थियो।
जानकारहरूका अनुसार यो सम्भावित साझेदारी पूर्ण रूपमा नयाँ गाडी विकास गर्न भन्दा पनि प्लेटफर्म, उत्पादन र प्रविधि साझा गर्ने विषयमा बढी केन्द्रित हुन सक्छ।
होन्डाले आफ्नो ‘पीएफटू’ प्लेटफर्म अन्तर्गत हाइब्रिड र वैकल्पिक इन्धनका गाडीहरू बजारमा ल्याउने तयारी गरिरहेको छ। अर्कोतर्फ, निसानसँग विद्युतीय गाडी (ईभी) प्रविधिमा राम्रो अनुभव छ। यस्तो अवस्थामा होन्डाले हाइब्रिड प्रविधि र निसानले विद्युतीय गाडीको प्रविधि एकअर्कासँग साटासाट गरेर फाइदा लिन सक्ने देखिन्छ।
यसले दुवै कम्पनीलाई ठूलो लगानी बिना नै नयाँ प्रविधिका गाडीहरू बजारमा उतार्न मद्दत गर्नेछ।
विगतका प्रयास र चुनौती
होन्डा र निसानबीच यसअघि पनि विश्वव्यापी रूपमा मर्जर गर्ने विषयमा छलफल भएको थियो। तर, व्यापारिक संरचना र कम्पनीको नियन्त्रण कसको हातमा रहने भन्ने विवादका कारण त्यो छलफल सफल हुन सकेन।
होन्डाले निसानलाई आफ्नो सहायक कम्पनी बनाउन चाहेको तर निसानले भने बराबरको हैसियत खोजेका कारण कुरा मिल्न सकेको थिएन। पुराना असहमतिहरूलाई बिर्सिएर अहिले दुवै कम्पनीहरू परियोजनामा आधारित छोटो अवधिको सहकार्यका लागि सकारात्मक देखिएका छन्।
यद्यपि, भारतको सन्दर्भमा दुवै कम्पनीबीच अहिलेसम्म कुनै औपचारिक वार्ता वा सम्झौता भने भइसकेको छैन। निसान अहिले रेनोसँगको साझेदारीमा आधारित रहेर भारतमा आफ्ना नयाँ मोडलहरू सार्वजनिक गर्ने र बजार हिस्सा बढाउने काममा व्यस्त छ। चेन्नईस्थित उद्योगमा निसानको ५१ प्रतिशत र रेनोको ४९ प्रतिशत सेयर छ।
तर, निसानले चीन जस्तो ठूलो बजारमा बेहोर्नुपरेको व्यापारिक दबाब र नयाँ सफ्टवेयर तथा आर्टिफिसियल इन्टेलिजेन्स (एआई) प्रविधिको आवश्यकताका कारण भारतमा होन्डासँगको नयाँ गठबन्धनलाई भविष्यको बलियो विकल्पका रूपमा हेरिएको छ।
