बालेन सरकारलाई पत्याएन शेयर बजारले: विज्ञ अर्थमन्त्री बने यता २२६ अंकले घट्यो नेप्से

काठमाडौं । नेपालको पूँजी बजारमा राजनीतिक परिवर्तन र नीतिगत नेतृत्वले ठूलो अर्थ राख्छ । जनस्तरबाट अत्यधिक रुचाइएका बालेन (बालेन्द्र) शाहको नेतृत्वमा नयाँ सरकार गठन हुँदा र अर्थतन्त्र बुझेका विज्ञ व्यक्ति डा. स्वर्णिम वाग्लेले अर्थमन्त्रालयको कमान्ड सम्हाल्दा लगानीकर्तामा एक किसिमको उत्साह छाएको थियो ।

बजारले नयाँ उचाइ समात्ने र नीतिगत अन्योलताहरू हट्ने अपेक्षा सबैले गरेका थिए । तर, व्यावहारिक रूपमा भने ठीक उल्टो परिदृश्य देखिएको छ । आम लगानीकर्ताको भरोसा जितेको बालेन सरकारलाई नेपालको एकमात्र शेयर बजार नेपाल स्टक एक्सचेञ्ज (नेप्से)ले भने पटक्कै पत्याएको देखिँदैन ।

विज्ञ अर्थमन्त्री वाग्लेको आगमनले पनि बजारको ओरालो यात्रालाई रोक्न सकेको छैन । जसका कारण नयाँ सरकार बने यता मात्रै नेप्से परिसूचक उल्लेख्य रूपमा घट्न पुगेको छ ।

तथ्याङ्कलाई हेर्ने हो भने बालेन सरकारले शपथ ग्रहण गर्नुभन्दा ठीक अघिल्लो दिन अर्थात् चैत १२ गते नेप्से परिसूचक २९५०.१६ विन्दुको उच्च स्थानमा अडिएको थियो । त्यो समयमा बजारले ३००० को मनोवैज्ञानिक विन्दु चुम्ने तरखर गरिरहेको भन्दै सर्वसाधारण लगानीकर्ता निकै उत्साहित थिए ।

नयाँ र विज्ञ नेतृत्व आएपछि बजारले थप गति लिने सबैको अनुमान थियो । तर, सरकार गठनपछिका दिनहरू पूँजी बजारका लागि सुखद रहन सकेनन् । नयाँ सरकार बनेयताका ६४ दिनको कारोबार अवधिमा बजार अधिकांश समय राताम्मे नै रह्यो । उतारचढावका बीच बुधबार (असार १७ गते) बजार ४४.५४ अंकले बढेर २६५२ विन्दुमा बन्द भए पनि समग्र चित्र भने निराशाजनक नै छ ।

बालेन सरकार गठन भए यता मात्रै नेप्से परिसूचक करिब २२६ अंकले ओरालो लागिसकेको छ । जसले बजारमा नयाँ सरकारप्रतिको अविश्वास वा अन्य नीतिगत कसिँदो अवस्थालाई झल्काउँछ ।

यो ठूलो गिरावटले यतिबेला आम लगानीकर्ताहरूलाई ठूलो अन्योलमा पारेको छ । बजार लगातार घट्दै जाँदा कतिपय साना तथा नयाँ लगानीकर्ताहरू नराम्ररी आत्तिएका छन् । पोर्टफोलियोको मूल्य दिनप्रतिदिन घट्दै गएका कारण बजारमा बस्ने कि बाहिरिने भन्ने दोधार उत्पन्न भएको छ ।

एकातिर विज्ञ अर्थमन्त्रीले ल्याउने आगामी मौद्रिक नीति र सुधारका कदमहरू कस्ता होलान् भन्ने चासो छ भने अर्कोतिर बजारको लगातारको गिरावटले उनीहरूको धैर्यताको बाँध टुट्न थालेको छ ।

यद्यपि, निराशाका बीच पनि लगानीकर्ताहरूमा एउटा झिनो आशा अझै बाँकी छ । ६४ दिनको अवधिमा केवल २४ दिन मात्रै बजार हरियो भए पनि पछिल्लो दिन (असार १७ गते) को ४४.५४ अंकको सुधारले केही राहत दिएको छ ।

बजार प्राविधिक रूपमा ’करेक्सन’को चरणमा रहेको र विज्ञ नेतृत्वले ढिलोचाँडो पूँजी बजारमैत्री नीतिहरू ल्याउने विश्वास लगानीकर्ताहरूमा छ । अहिले आत्तिएर सस्तोमा शेयर बेच्नुभन्दा पर्ख र हेरको रणनीति अपनाउँदै आगामी दिनमा बजारले पुन: लय समात्ने र २९५० को विन्दुलाई नाघेर अघि बढ्ने आशामा लगानीकर्ताहरू दृढ देखिन्छन् ।