लायन्स क्लब अफ काठमाडौं समर्पणद्वारा रक्तदानसहित सामाजिक सेवामार्फत नयाँ लायन्स वर्षको शुभारम्भ
काठमाडौं । लायन्स इन्टरनेशनल डिस्ट्रिक्ट ३२५ आई (एमडी ३२५), नेपाल अन्तर्गतको लायन्स क्लब अफ काठमाडौं समर्पणले नवनिर्वाचित अध्यक्ष लायन दीपक कुमार अग्रवालको नेतृत्वमा लायन्स वर्ष २०२६–२७ को शुभारम्भ विभिन्न सामाजिक सेवामूलक कार्यक्रममार्फत गरेको छ।
क्लबले यस वर्षको मूल नारा ‘साझा गरौं, सेवामार्फत माया बाँडौं’ लाई आत्मसात गर्दै पहिलो दिन नक्सालस्थित ब्लु स्क्वायरमा यामाहा र एमएडब्लु फाउन्डेसनको सहकार्यमा वृहत् रक्तदान कार्यक्रम आयोजना गरेको जनाएको छ। कार्यक्रममा क्लबका सदस्य, स्वयंसेवक तथा शुभेच्छुक गरी एक सयभन्दा बढी व्यक्तिको सहभागिता रहेको थियो। उक्त कार्यक्रमबाट ६८ पिन्ट रगत संकलन भएको क्लबले जनाएको छ।
यसअघि बिहान क्लबले विद्यार्थीहरूको सहभागितामा ट्राफिक स्वयंसेवा कार्यक्रम पनि सञ्चालन गरेको थियो। यामाहा र एमएडब्लु फाउन्डेसनको सहकार्यमा सम्पन्न उक्त कार्यक्रममार्फत ट्राफिक व्यवस्थापनमा सहयोग गर्नुका साथै सडक सुरक्षा र नागरिक उत्तरदायित्वबारे जनचेतना अभिवृद्धि गर्ने उद्देश्य राखिएको थियो।
क्लबका अध्यक्ष दीपक कुमार अग्रवालले नयाँ लायन्स वर्ष सेवाभाव, समर्पण र सामाजिक उत्तरदायित्वका साथ सुरु भएको उल्लेख गर्दै समाजलाई केही फर्काउने सानो प्रयासले पनि धेरैको जीवनमा ठूलो परिवर्तन ल्याउन सक्ने बताए। उनका अनुसार रक्तदान र ट्राफिक स्वयंसेवा कार्यक्रम त्यसैको उदाहरण हुन्।
कार्यक्रममा क्लबका सदस्यहरूको उत्साहजनक सहभागिताले समाजप्रति लायन्सको सेवाभाव, नेतृत्व क्षमता तथा सामूहिक उत्तरदायित्वलाई थप सुदृढ बनाएको क्लबको भनाइ छ।
क्लबले रक्तदाता, स्वयंसेवक, विद्यार्थी, स्वास्थ्यकर्मी, यामाहा, एमएडब्लु फाउन्डेसन तथा कार्यक्रम सफल बनाउन सहयोग पुर्याउने सम्पूर्ण सहयोगी संस्थाप्रति आभार व्यक्त गरेको छ।
नयाँ लायन्स वर्षसँगै क्लबले शिक्षा, स्वास्थ्य, वातावरण संरक्षण, युवा सशक्तीकरण तथा मानवीय सेवासम्बन्धी विविध कार्यक्रम सञ्चालन गर्दै समाजमा सकारात्मक परिवर्तन ल्याउने अभियानलाई अझ प्रभावकारी रूपमा अघि बढाउने प्रतिबद्धता जनाएको छ।
क्लबले अघि सारेको सन्देश छ— ‘हाम्रो सानो सेवाले समाजमा ठूलो परिवर्तन ल्याउन सक्छ।’
