चिनियाँ बजारमा तहल्का मच्चाएको चेरी क्यूक्यू३ नेपाल आउँदै, नाइमा अटो शोमा मुख्य आकर्षण!

चिनियाँ बजारमा छोटो समयमै अत्यधिक लोकप्रिय बनेको आधुनिक र पूर्ण इलेक्ट्रिक चेरी क्युक्यू३ कार नेपाली बजारमा भित्रिने भएको छ । शारदा ग्रुपअन्तर्गतको एसपीजी अटोमोबाइल्सले यो गाडी नेपालमा ‘लञ्च’ गर्न नाइमा अटो शोको साइत जुराएको छ ।

काठमाडौँ । यही साउनको अन्तिम साता काठमाडौँमा सुरु हुन लागेको ‘नाइमा अटो शो’ मा कयौँ नयाँ गाडीहरु नेपाली बजारमा सार्वजनिक हुने तयारीमा छन्। त्यसमध्ये नेपाली ग्राहकको विशेष ध्यान तान्न सक्ने एउटा असाध्यै राम्रो प्रडक्टका रुपमा चेरीको क्युक्यू३ इलेक्ट्रिक कार आउने भएको छ।

नेपालमा चेरी ब्राण्डका गाडीहरु आयात गरेर बिक्री गर्ने आधिकारिक अधिकार शारदा ग्रुप अन्तर्गतको कम्पनी एसपीजी अटोमोबाइल्स प्राइभेट लिमिटेडसँग छ। उक्त कम्पनीले यस पटकको नाइमा अटो शोमा क्युक्यू३ गाडीलाई नेपाली बजारमा बिक्रीका लागि औपचारिक रुपमा सार्वजनिक गर्ने घोषणा गरेसँगै यस गाडीप्रति उपभोक्ताको चासो बढेको छ।

सन् २००३ मा पहिलो पटक बजारमा आउँदा चेरी क्युक्यू चिनियाँ अटो बजारमा एक ऐतिहासिक र किफायती गाडीका रुपमा स्थापित भएको थियो, जसले लाखौँ युवाहरुलाई पहिलो कारको मालिक बन्न सहयोग गरेको थियो।

एक दशक लामो विश्रामपछि चेरीले यस चर्चित ब्राण्डलाई पूर्ण रुपमा विद्युतीय अवतारमा पुनः बजारमा उतारेको हो। सहरी क्षेत्रको यात्रालाई सहज बनाउने उद्देश्यका साथ तयार पारिएको यो चार ढोका भएको सब-कम्प्याक्ट ह्याचब्याक कारले चीनमा सार्वजनिक भएको दुई घण्टामै ५६ हजार ८ सय ७९ वटा बुकिङ प्राप्त गरेर नयाँ रेकर्ड कायम गरिसकेको छ।

आकर्षक डिजाइन र उपयुक्त आकार

नयाँ क्युक्यू३ कारको बाहिरी बनावट गोलो र वर्गाकारको समिश्रण अर्थात् ‘स्क्वायर विदिन राउन्ड’ डिजाइन सिद्धान्तमा आधारित छ। यसको अगाडिको भागमा बन्द ग्रिल, आकर्षक क्यु आकारका एलइडी हेडलाइट र गोलाकार एयर इनटेक राखिएका छन्।

गाडीको बनोटलाई आधुनिक लुक दिन यसमा अर्ध-लुकेका (सेमी-कन्सिल्ड) डोर ह्यान्डल र कालो व्हील आर्च ट्रिम प्रयोग गरिएको छ। यसको सी-पिलरमा क्युक्यूको पुराना यादहरु ताजा गराउने प्रतिष्ठित ‘क्यु’ लोगोलाई निरन्तरता दिइएको छ। ६ वटा भिन्न रङ्ग र आफू अनुकूल परिवर्तन गर्न सकिने छतको विकल्पमा यो गाडी उपलब्ध हुनेछ।

यो कारको कुल लम्बाइ ४ हजार १ सय ९५ मिलिमिटर (कतिपय तथ्याङ्कमा ४ हजार २०० मिलिमिटर), चौडाई १ हजार ८ सय ११ मिलिमिटर र उचाई १ हजार ५ सय ७३ मिलिमिटर रहेको छ। यसमा २ हजार ७ सय मिलिमिटरको लामो ह्विलबेस दिइएको छ, जसले गर्दा कारको भित्री भागमा पर्याप्त ठाउँ उपलब्ध हुन्छ।

कारको पछाडि ३ सय ७५ लिटरको ट्रंक स्पेस छ, जसलाई सिट विन्डिङ गरेर १ हजार ४ सय ५० लिटरसम्म बढाउन सकिन्छ। यसका साथै गाडीको अगाडिको भागमा ७० लिटरको र पछाडिको सिटमुनि ३५ लिटरको अतिरिक्त भण्डारण क्षमतासहित गाडीभित्र कुल ३८ वटा विभिन्न सामान राख्ने ठाउँहरु बनाइएका छन्।

दमदार पावर र ब्याट्री क्षमता

नयाँ क्युक्यू३ मा रियर-ह्वील ड्राइभ लेआउट छ, जसमा पछाडि इलेक्ट्रिक मोटर जडान गरिएको छ। यो गाडी दुईवटा मोटर पावर विकल्पमा उपलब्ध छ। पहिलो ५८ किलोवाट (७८ हर्सपावर) जसले ९० एनएम टर्क दिन्छ र दोस्रो ९० किलोवाट (१२१ हर्सपावर) जसले १ सय १५ एनएम टर्क पैदा गर्छ।

बलियो मोटर भएको संस्करणले सहरी क्षेत्रमा उत्कृष्ट प्रदर्शन गर्छ र यसले मात्र ३.८ सेकेन्डमा शून्यदेखि ५० किलोमिटर प्रतिघण्टाको गति समात्न सक्छ। यस कारको अधिकतम गति प्रतिघण्टा १ सय २५ किलोमिटर तोकिएको छ।

यसमा गोसन हाई-टेक कम्पनीले निर्माण गरेको लिथियम आइरन फस्फेट (एलएफपी) ब्याट्री प्रयोग गरिएको छ। ब्याट्रीमा पनि २९.४८ किलोवाट आवर र ४१.२८ किलोवाट आवरका दुई विकल्प छन्, जसले सीएलटीसी मापदण्ड अनुसार क्रमशः ३ सय १० किलोमिटर (कतिपय अवस्थामा २८० किमी) देखि ४ सय २० किलोमिटर (कतिपय अवस्थामा ४०१ किमी) सम्मको ड्राइभिङ रेन्ज प्रदान गर्छन्।

यो कारले फास्ट चार्जिङ सपोर्ट गर्छ, जसको मद्दतले ब्याट्रीलाई ३० प्रतिशतबाट ८० प्रतिशतसम्म चार्ज गर्न बढीमा १६.५ मिनेट मात्र लाग्छ। साथै यसमा ३.३ किलोवाट र ६.६ किलोवाट आउटपुट दिने व्हीकल-टु-लोड (भीटूएल) प्रविधि पनि समावेश छ, जसबाट अन्य विद्युतीय उपकरण चलाउन सकिन्छ।

प्रविधि र सुविधायुक्त भित्री भाग

गाडीको भित्री क्याबिन कालो र हरियो रङ्गको थिममा सजाइएको छ, जहाँ चेरीको एआई लिङ्क्सी ककपिट प्रणाली जडान गरिएको छ। यसको ड्यासबोर्डमा क्वाेलकम स्न्यापड्र्यागन ८१५५ चिपद्वारा सञ्चालित १५.६ इन्चको विशाल २.५ के फ्लोटिङ टचस्क्रिन र ८.८ इन्चको डिजिटल इन्स्ट्रुमेन्ट क्लस्टर छ।

यो प्रणालीले एप्पल कारप्ले, हुवावे हाईकार र कारलिङ्क सपोर्ट गर्नुका साथै एआई कारमाइन्ड एजेन्टमार्फत आवाजकै भरमा विभिन्न कमाण्डहरु लिने गर्छ।

यात्रुको आरामका लागि यसमा तातो र चिसो गराउन मिल्ने (भेन्टिलेटेड र हिटेड) अगाडिका सिटहरु, एम्बियन्ट लाइट, ५० वाटको वायरलेस फोन चार्जिङ, ब्लुटुथ की, स्मार्ट तापक्रम नियन्त्रण गर्ने ऐना र एउटा सानो फ्रिज समेत राखिएको छ। यसका साथै कारमा क्याम्पिङ मोड, पेट (घरपालुवा जनावर) मोड र सुरक्षाका लागि सेन्ट्री मोड जस्ता विशेष सुविधाहरु दिइएका छन्।

सुरक्षा र इन्टेलिजेन्ट ड्राइभिङ

चेरीले क्युक्यू३ को सुरक्षामा विशेष जोड दिएको छ। यसको बडी स्ट्रक्चरमा ६८ प्रतिशत उच्च शक्ति भएको स्टील (हाई-स्ट्रेंथ स्टील) प्रयोग गरिएको छ र यसमा ६ वटा एयरब्यागहरु राखिएका छन्। यसको ब्याट्री व्यवस्थापन प्रणालीमा रियल-टाइम क्लाउड मनिटरिङ र लिक्विड कुलिङ प्रविधि समावेश छ।

सवारी चालकलाई सहयोग गर्न यसमा होराइजन जे६ई चिप र ८० टप्स कम्प्युटिङ पावरद्वारा सञ्चालित फाल्कन ५०० इन्टेलिजेन्ट ड्राइभिङ असिस्टेन्स सिस्टम राखिएको छ।

यो सफ्टवेयरले बिना लिडार प्रविधि पनि १०० भन्दा बढी फरक वातावरणीय परिस्थितिहरुमा आफैँ गाडी पार्क गर्न (अटोमेटेड पार्किङ) सक्षम छ। यसका साथै यसले राजमार्ग र जटिल सहरी सडकहरुमा नेभिगेसन असिस्टेड ड्राइभिङ (हाई-स्पीड एनओए) को सुविधा दिन्छ, जसले यात्रालाई सुरक्षित र आरामदायी बनाउँछ।

चिनियाँ बजारको मूल्य र प्रतिस्पर्धा

चीनमा यो कारले गिट्टी इएक्स२, बीवाइडी सिगल र लिपमोटर ए१० जस्ता स्थापित मोडलहरुसँग कडा प्रतिस्पर्धा गरिरहेको छ। चिनियाँ बजारमा यसको सुरुवाती प्रि-सेल मूल्य ६८ हजार ८ सय युआन (करिब १५ लाख ४१ हजार १ सय २० नेपाली रुपैयाँ) देखि ९७ हजार ९ सय युआन (करिब २१ लाख ९२ हजार ९ सय ६० नेपाली रुपैयाँ) सम्म तय गरिएको थियो।

तर, बजारमा प्रतिस्पर्धा तीव्र बनाउन चेरीले सीमित अवधिका लागि यसको सुरुवाती बिक्री मूल्य ५८ हजार ९ सय युआन (करिब १३ लाख १९ हजार ३ सय ६० नेपाली रुपैयाँ) कायम गरेको थियो भने यसको सबैभन्दा प्रिमियम संस्करणको सीमित अवधिको मूल्य ७८ हजार ९ सय युआन (करिब १७ लाख ६७ हजार ३ सय ६० नेपाली रुपैयाँ) तोकेको थियो।

चिनियाँ बजारको यो आक्रामक मूल्य रणनीति र नेपाली बजारमा एसपीजी अटोमोबाइल्सको तयारीले आगामी नाइमा अटो शोमा चेरी क्युक्यू३ ग्राहकको प्रमुख रोजाइ बन्न सक्ने अनुमान गरिएको छ।