कर छुटको सुविधा र ३५० सिसीको एकाधिकार, रोयल इनफिल्डले नेपालमा कसरी विस्तार गर्दैछ बजार?
सरकारी कर छुट र ३५० सिसीमाथिको प्रिमियम खण्डमा एकलौटी पकडका कारण नेपालमै एसेम्बल हुने रोयल इनफिल्डको व्यापारले ९ महिनामै अघिल्लो सिङ्गो वर्षको कीर्तिमान तोडेको छ।
काठमाडौँ । नेपाली सडकमा क्लासिक र प्रिमियम मोटरसाइकलको पहिचान बनाएको ‘रोयल इनफिल्ड’को स्थानीय एसेम्बल तथा बिक्री व्यवसायमा उल्लेखनीय सुधार देखिएको छ।
नेपालका लागि यस ब्रान्डको आधिकारिक निर्माता टीजी अटो ग्रुप प्रालिले गत आर्थिक वर्ष २०८२/८३ को सुरुवाती नौ महिनामै ४ अर्ब रुपैयाँभन्दा बढीको व्यापार गर्न सफल भएको छ। यो आम्दानी अघिल्लो सिङ्गो आर्थिक वर्ष २०८१/८२ को कुल कारोबार ३ अर्ब ७४ करोड ४० लाख रुपैयाँको तुलनामा पनि बढी हो।
त्रिवेणी ग्रुपअन्तर्गत सञ्चालित यस कम्पनीको व्यापार विस्तारमा मोटरसाइकलको बिक्री संख्यामा भएको वृद्धि र मूल्यमा गरिएको समायोजनले मुख्य भूमिका खेलेको देखिन्छ। व्यावसायिक गतिविधि बढेसँगै कम्पनीको सञ्चालन नाफाको मार्जिन ६.५७ प्रतिशतबाट उकालो लागेर ८.४८ प्रतिशत पुगेको छ भने नगद सञ्चितिसमेत साढे २६ करोड रुपैयाँ नाघेको छ।
सन् २०२२ मा स्थापना भएर बारास्थित एक लाख वर्गफुटको अत्याधुनिक कारखानामार्फत वार्षिक २० हजार मोटरसाइकल उत्पादन गर्ने क्षमता बनाएको यस कम्पनीले छोटो समयमै वित्तीय स्थिति बलियो बनाएको छ।
भारतको आइशर मोटर्सबाट ल्याइने पार्टपुर्जाहरू नेपालमै जोडेर (एसेम्बल गरेर) तयार पारिने भएकाले कम्पनीले सरकारबाट भन्सार र अन्तःशुल्कमा पाएको ठूलो सहुलियतलाई आफ्नो व्यावसायिक सफलताको जग मानेको छ। तयारी मोटरसाइकल आयात गर्दा लाग्ने शुल्कको तुलनामा देशभित्रै एसेम्बल गर्दा पाइने कर छुटले गर्दा प्रतिस्पर्धी मूल्यमा सवारी साधन बजारमा पठाउन सम्भव भएको कम्पनीको दाबी छ।
वीरेन्द्रकुमार संघाईको नेतृत्वमा रहेको यस कम्पनीले अल्फा अटोमोटिभमार्फत देशभर मोटरसाइकल बिक्री वितरण गर्दै आएको छ। काठमाडौँ उपत्यकामा प्रायः नगदमै व्यापार हुने र बाहिरका जिल्लाहरूमा पनि उधारो भुक्तानीको समय छोटो रहेकाले कम्पनीको नगद चक्र र कार्यशील पुँजी व्यवस्थापन चुस्त देखिएको छ।
विशेषगरी ३५० सिसीभन्दा माथिका प्रिमियम खण्डका मोटरसाइकलमा ग्राहकको दरिलो साथ पाएको रोयल इनफिल्डले आगामी दिनमा पनि आफ्नो वर्चस्व कायम रहने विश्वास लिएको छ। बजारमा रहेका अधिकांश अन्य प्रतिस्पर्धी ब्रान्डहरू २५० सिसीभन्दा कम क्षमताका सवारीमा केन्द्रित रहेकाले कम्पनीले प्रिमियम सेग्मेन्टमा आफूलाई सुरक्षित ठानेको छ।
यद्यपि, विद्युतीय सवारीको तीव्र विस्तार, अन्य नयाँ एसेम्बल उद्योगहरूको आगमन र सरकारको अस्थिर नीति भने यस व्यवसायका लागि प्रमुख चुनौतीका रूपमा रहेका छन्।
मोटरसाइकललाई विलासी वस्तु मानिने नेपाली बजारमा भन्सार तथा करका दरमा हुने सम्भावित फेरबदल र नेपाल राष्ट्र बैंकले सवारी कर्जामा ल्याउने कडा नियमहरूले भविष्यको व्यापारलाई प्रभावित पार्न सक्ने जोखिम अझै कायम छ। व्यावसायिक दायरा बढाउने क्रममै कम्पनीको बैंकिङ ऋण पनि ७० करोडबाट बढेर १ अर्ब रुपैयाँ पुगेको छ।
