सिमरिक एयरको नयाँ हेलिकप्टर: ९ एन-एओओ अब नेपाली आकाशमा
काठमाडौँ । सिमरिक एयर हेलिकप्टरले आफ्नो उडान सेवालाई अझ प्रभावकारी र सुदृढ बनाउन नयाँ हेलिकप्टर ‘एयरबस एच १२५’ (AS350 B3e) थप गरेको छ।
आज (जनवरी ३०, २०२६) का दिन कम्पनीले ९एन-९ एन-एओओ रजिस्ट्रेसन नम्बर रहेको उक्त हेलिकप्टर सञ्चालनमा ल्याएको औपचारिक घोषणा गरेको हो।
यससँगै नेपालको कठिन भौगोलिक बनावट र उच्च हिमाली क्षेत्रमा हुने खोज, उद्धार तथा अन्य उडान मिसनहरूमा कम्पनीको क्षमता थप बलियो भएको छ।
विश्वभर उच्च हिमाली उडानका लागि मानक मानिने एयरबस एच १२५ हेलिकप्टर विशेषगरी हिमालमा गरिने उद्धार कार्य, मेडिकल इभ्याकुएसन (बिरामी उद्धार), तीर्थयात्रा र दुर्गम क्षेत्रका चार्टर उडानका लागि अत्यन्तै विश्वसनीय मानिन्छ। यसको शक्तिशाली इन्जिन र धेरै भार बोक्न सक्ने क्षमताका कारण हिमालयन वातावरणमा उडान भर्न यो सबैभन्दा उपयुक्त हेलिकप्टरमध्ये एक हो।
यस नयाँ हेलिकप्टरको आगमनसँगै सिमरिक एयरले नेपाल सरकारका निकायहरू, पर्यटन तथा ट्रेकिङ व्यवसायी, कूटनीतिक नियोगहरू, गैरसरकारी संस्थाहरू र आपतकालीन उद्धार टोलीहरूलाई अझ सुरक्षित र भरपर्दो सेवा प्रदान गर्ने प्रतिबद्धता जनाएको छ। यो विस्तारले कम्पनीको कार्यक्षमता बढाउनुका साथै कठिन वातावरणीय परिस्थितिमा पनि ग्राहकहरूलाई छिटो र छरितो सेवा दिन मद्दत पुग्ने विश्वास लिइएको छ।
नयाँ थपिएको हेलिकप्टरले हिमाली उद्धार, लङलाइन उद्धार, कार्गो ढुवानी, एरियल फायर फाइटिङ (आगो निभाउने कार्य), र एरियल सर्भे जस्ता चुनौतीपूर्ण कार्यहरूमा महत्त्वपूर्ण भूमिका खेल्नेछ। यसका साथै भिआईपी उडान, फिल्मिङ, स्काई डाइभिङ र धार्मिक पर्यटकीय उडानहरूमा पनि यसलाई परिचालन गरिने कम्पनीले जनाएको छ।
हाल सिमरिक एयरसँग यो सहित कुल चारवटा हेलिकप्टर पुगेका छन्, जसमा तीनवटा एयरबस एच १२५ र एउटा बेल ५०५ जेट रेन्जर एक्स रहेका छन्। नेपालको उड्डयन, पर्यटन र आपतकालीन उद्धार क्षेत्रमा अग्रणी भूमिका निर्वाह गर्दै आएको सिमरिक एयरले यस बेड विस्तारमार्फत सुरक्षा र व्यावसायिकतालाई थप उचाइमा पुर्याउने लक्ष्य राखेको छ।
