असाेजमा लञ्च हुने तयारीमा जिली इएक्स फाइभ, कस्तो छ नयाँ इलेक्ट्रिक एसयुभीको विशेषता?

विशाल फ्रंक, पछाडिको भागमा शक्तिशाली मोटर र आधुनिक लिडार सेन्सरसहित जिली इएक्स फाइभ असाेज ५ (सेप्टेम्बर २१) मा सार्वजनिक हुँदैछ।

काठमाडाैँ । आगामी सेप्टेम्बर २१ मा औपचारिक रूपमा बजारमा भित्रिन लागेको नयाँ जिली इएक्स फाइभको बोनेटमुनि निकै फराकिलो फ्रंक अर्थात् अगाडिको भागमा सामान राख्ने ठाउँ देखिएको छ। एक अज्ञात कारप्रेमीले अनलाइनमार्फत सार्वजनिक गरेका यी नयाँ तस्बिरहरूले यो एसयुभीको बनोटबारे थप खुलसा गरेका छन्।

यद्यपि यसको आयतन कति लिटर छ भन्ने आधिकारिक रूपमा खुलाइएको छैन, तर फ्रंकमा राखिएको विवरणअनुसार यसमा अधिकतम ५० किलोग्रामसम्मको भार बोक्न सक्ने क्षमता रहेको छ। यसअघि सानो आकारको जिली इ२ (इएक्स२) मा ७० लिटरको फ्रंक उपलब्ध गराइएको थियो।

पछिल्लो समय चिनियाँ अटोमोबाइल कम्पनीहरूले आफ्ना विद्युतीय सवारीसाधनमा फराकिलो फ्रंक राख्ने प्रवृत्तिलाई तीव्रता दिएका छन्। जिली इएक्स फाइभ पनि यसै अभ्यासबाट प्रेरित देखिएको छ।

गाडीमा देखिएको यो नयाँ संरचनाले यस सहरी क्रसओभरमा पछाडिको चक्काले तान्ने (रियर-ह्विल-ड्राइभ) लेआउटसहितका महत्वपूर्ण ढाँचागत सुधारहरू गरिएको संकेत गर्छ। यसअघि यस गाडीको चार्ज गर्ने पोर्ट अगाडिको फेन्डरबाट सारेर पछाडि पुर्‍याइएको थियो, जसले यसमा आरडब्ल्युडी प्रणाली अपनाइएको पुष्टि गर्छ।

शक्तिशाली मोटर

नयाँ इएक्स फाइभको पछाडिको एक्सीमा ‘टीजेड१८४क्यूवाइ३०१’ नामक सिंगल इलेक्ट्रिक मोटर जडान गरिएको छ, जसले अधिकतम २४५ किलोवाट अर्थात् ३२९ हर्सपावर शक्ति उत्पादन गर्छ।

यो शक्ति हाल बजारमा उपलब्ध मोडेलको भन्दा ११४ हर्सपावरले बढी हो। यस परिवर्तनसँगै गाडीको अधिकतम गति पनि प्रतिघन्टा १७५ किलोमिटरबाट बढेर २०१ किलोमिटर पुगेको छ।

यो इलेक्ट्रिक मोटर एलएफपी ब्याट्रीद्वारा सञ्चालित हुन्छ, जसको क्षमता भने हालसम्म सार्वजनिक गरिएको छैन। यो एसयुभीको लम्बाइ ४६३६ मिलिमिटर, चौाइ १९२० मिलिमिटर र उचाइ १६७० मिलिमिटर रहेको छ भने यसको ह्विलबेस २७५० मिलिमिटर छ। अद्यावधिक गरिएको यो नयाँ मोडल पुरानो भेरियन्टको तुलनामा २१ मिलिमिटरले लामो छ।

आधुनिक प्रविधि र बजार रणनीति

अद्यावधिक गरिएको इएक्स फाइभमा नयाँ बम्पर, अर्ध-लुकेका ढोकाका ह्यान्डलहरू र छानामा राखिएको लिडार सेन्सर जडान गरिएको छ।

छानामा रहेको यो सेन्सरले यसमा ‘जी-एएसडी जी-पाइलट एच५’ नामक एड्भान्स्ड ड्राइभिङ असिस्टेन्ट सिस्टम प्रयोग भएको देखाउँछ, जसले सहरी सडक र राजमार्गहरूमा नेभिगेट अन अटोपायलट (एनओए) कार्यसम्पादन गर्न सक्षम छ। यसबाहेक अगाडिका फेन्डरहरूमा साइड क्यामेराहरू र रुफ स्पोइलरमा अर्को अतिरिक्त क्यामेरा पनि यसमा समाहित गरिएको छ।

जिली ग्यालेक्सीका जनसम्पर्क प्रमुख सान आइफुले वेइबोमार्फत यसको बाहिरी बनावट धेरै हदसम्म उस्तै रहेको जनाएका छन्। यद्यपि, यस मोडलको भित्री संरचना, आन्तरिक पार्टपुर्जा र इलेक्ट्रोनिक प्रणालीमा भने व्यापक परिमार्जन र स्तरोन्नति गरिएको उनले प्रस्ट्याएका छन्।

उनले यो गाडी सेप्टेम्बर २०२६ मा चिनियाँ बजारमा प्रवेश गर्ने बताएका छन् भने अन्य स्रोतहरूले सेप्टेम्बर २१ लाई लञ्चको दिनका रूपमा उल्लेख गरेका छन्।

चाइना इभी डेटा ट्र्याकरका अनुसार, जिली इएक्स फाइभले सन् २०२६ को जनवरीदेखि अगस्टसम्मको अवधिमा ४० हजार ७७६ वटा युनिट डेलिभरी गरेको छ, जुन गत वर्षको तुलनामा ४५ दशमलव ९ प्रतिशतले घटेको हो।

यस तथ्यांकले पनि यो मोडललाई बजारमा टिकाउन अब ठूलै अपडेटको खाँचो रहेको देखाएको छ। यो एसयुभी चिनियाँ बजारबाहेक जिलीका विदेशस्थित प्रमुख मोडलहरूमध्ये पनि एक हो।