सेयर बजारमा भारी अंकको गिरावट, १८४ कम्पनीको सेयर मूल्य घट्यो
काठमाडौं । आइतबार सेयर बजारमा भारी गिरावट आएको छ । यस दिन सेयर बजार मापक नेप्से परिसूचक ७९.८८ अंकले घटेर २८९४.५७ बिन्दुमा ओर्लिएको छ ।
कारोबार अवधिभर ४ करोड २६ लाख ८६ हजार ६४० कित्ता सेयर १९ अर्ब ७४ करोड ५ लाख ९३ हजार रुपैयाँमा किनबेच भएको छ । निरन्तर उकालो लागिरहेको सेयरमा आज भारी गिरावट आएको हो ।
यसदिन माइक्रोफाइनान्स बाहेक अन्य सबै उपसूचक घटेका छन् ।
बजार घटेसँगै १८४ कम्पनीको सेयर मूल्य घटेको छ भने ६० कम्पनीको बढेको छ ।
यस दिन विन नेपाल लघुवित्त, उपकार लघुवित्त र आत्मनिर्भर लघुवित्तको सेयर मूल्यमा भने सकारात्मक सर्किट लागेको छ । यी ३ कम्पनीको सेयर मूल्य १० प्रतिशतले बढेको छ ।
मन्दाकिनी हाइड्रोपावर, कुथेली बुखरी स्मल हाइड्रोपावर लगायत कम्पनीको सेयर मूल्य सर्वाधिक घटेका छन् ।
यता, कारोबार रकमको आधारमा भने अपि पावर अगाडि छ । कम्पनीको ८४ करोड ४५ लाख ३९ हजार रुपैयाँको कारोबार भएको छ । त्यसैगरी हिमालयन रि-इन्स्योरेन्स, शाइन रेसुंगा डेभलपमेन्ट बैंक, अरुण भ्याली हाइड्रोपावर, शिवम् सिमेन्ट लगायत कम्पनीको सर्वाधिक कारोबार भएको छ ।
