साढे ८ अर्ब निक्षेप संकलन गर्दै सरकार
काठमाडौं । आज सरकारले ८ अर्ब ५० करोड रुपैयाँको ट्रेजरी बिल संकलन गर्ने भएको छ ।
यो ९१ दिने ट्रेजरी बिलको बिक्रीमार्फत हुनेछ । चालु आर्थिक वर्षमा सरकारले ३ खर्ब ६२ अर्ब रुपैयाँ आन्तरिक ऋण संकलन गर्ने लक्ष्य राखेको छ । जसमा १ खर्ब ३० अर्ब ट्रेजरी बिल्स अन्तर्गत संकलन गरिनेछ ।
सरकारले हालका बैंकहरूको अधिक लगानीयोग्य रकम र ब्याजदरको सस्तो अवस्थालाई ध्यानमा राख्दै आन्तरिक ऋणको मात्रामा वृद्धि गर्दै आएको छ । ट्रेजरी बिल एक वर्ष वा कम अवधिको ऋण उठाउन प्रयोग हुने सरकारी ऋणपत्र हो । यसमा २८, ९१, १८२, र ३६४ दिनका विभिन्न किसिमका ट्रेजरी बिलहरू जारी गरिन्छ ।
गत १६ गतेको ट्रेजरी बिक्रीमा, ८१ दिने ट्रेजरी बिलको ब्याजदर २.३२ प्रतिशतसम्म पुगेको थियो । जबकि ३६४ दिने ट्रेजरी बिलमा २.६९ प्रतिशत ब्याजदर प्रस्ताव गरिएको थियो ।
ट्रेजरी बिलहरू बोलकबोल प्रणालीमार्फत निष्कासन गरिन्छ । जसमा विभिन्न बोलदाताले फरक–फरक मूल्य प्रस्ताव गर्छन् र औसत मूल्यमा वितरण गरिन्छ । यस प्रणालीले सरकारलाई द्रुत तरलता जुटाउन मद्दत पुर्याउँछ ।
राष्ट्र बैंकबाट स्वीकृत बैंक, वित्तीय संस्था, गैर–बैंक संस्थाहरू र सर्वसाधारणले ट्रेजरी बिलको बोलकबोलमा सहभागी हुन सक्छन् । जसमा १५ प्रतिशत रकम अप्रतिस्पर्धीका लागि छुट्याइन्छ ।
