मंगलबारदेखि सेयर बजारमा अन्तिम १५ मिनेटको भारित औसत गणना विधि हट्दै
काठमाडौं । नेपाल स्टक एक्स्चेन्जले अन्तिम १५ मिनेटको भारित औसत गणना विधि हटाउनेको छ।
नेपाल धितोपत्र बोर्डले १५ मिनेटको भारित औसत गणना विधि स्थगित गर्न नेप्सेलाई पत्र पठाएपछि मंगलबारदेखी लागु हुने गरी उक्त विधि हटाउन लागिएको नेप्सेका प्रवक्ता मुराहरि पराजुलीले बताए ।
भोलि घटस्थापनाका कारण सार्वजनिक विदा हुने भएकाले बजार बन्द रहनेछ।
अन्तिम १५ मिनेटको भारित औसत गणना विधिको आलोचना गर्दा अधिकांश लगानीकर्ताले यसका कारण बजारमा उतारचढाव बढेको बताएका थिए। यो विधि गत चैत ७ गतेबाट लागू गरिएको थियो, र यसको हटाइँसँगै अब सूचकहरू केवल अन्तिम कारोबार मूल्यका आधारमा गणना गरिने छन्।
यस विधिमा २ः४५ बजेदेखि ३ बजेसम्मको कारोबारको आधारमा भारित औसत मूल्यको हिसाबले सूचक गणना गरिन्थ्यो। यो प्रणालीले बजारमा अनावश्यक उतारचढाव ल्याएको भन्दै लगानीकर्ताले विरोध जनाएका थिए।
साथै, भारित औसत गणना विधिमा केही त्रुटिहरू पनि देखिएका थिए। नेप्सेको प्राविधिक प्रणाली अटोमेटेड र स्तरीय नभएको कारण ब्रोकरहरूले यस विधि हटाउनुपर्ने माग पनि गर्दै आएका थिए।
