पछिल्लो २४ घण्टामा करिब दुई हजारको कोरोना परीक्षण
काठमाडौं । कोरोना भाइरसको आशंकामा पछिल्लो चौबीस घण्टामा करिब दुई हजारको नमुना परीक्षण गरिएको छ । स्वास्थ्य तथा जनसंख्या मन्त्रालयले आज गरेको प्रेस ब्रिफिङमा प्रवक्ता डा. विकास देवकोटाले पछिल्लो चौबीस घण्टामा कोरोनाको आशंकामा एक हजार ८६९ जनाको नमुना परीक्षण गरिएको जानकारी दिए । हालसम्म कोरोना भाइरसको आशंकामा पीसीआर विधिबाट करिब १५ हजार ४९२ जनाको नमुना परीक्षण गरिएको उनले जानकारी दिए । देवकोटाका अनुसार अहिलेसम्म ५४ हजार ५३१ जनाको आरडीटी परीक्षण गरिएको छ ।
हालसम्म डिस्चार्ज हुनेको संख्या ३० पुगेको छ । तर तीनजना पुनः संक्रमण देखिएर अस्पतालमा उपचाररत छन् भने विभिन्न अस्पतालमा ७२ संक्रमित उपचाररत रहेका छन् ।
आज थप एकजनामा कोरोना संक्रमण देखिएसँगै नेपालमा १०२ संक्रमित पुगेका छ । संक्रमितमा ७४ जना पुरुष र २८ महिला छन् ।
आज देशैभरका विभिन्न अस्पतालमा आइसोलेसनमा कोरोना भाइरसको आशंकामा एक सय ३५ जना छन् । जसमा काठमाडौं उपत्यकमा तीनजना र उपत्यकाबाहिर १३२ जना छन् । सातै प्रदेशका क्वारेन्टाइनमा १५ हजार ६५४ जना छन् ।
