अपर तामाकोशी हाइड्रोपावरको हकप्रदमा २ अर्ब ४० करोड रुपैयाँ संकलन, कति पर्यो आवेदन ?
काठमाडौं । अपर तामाकोशी हाइड्रोपावर कम्पनीको हकप्रदमा २ अर्ब ४० करोड ४७ हजार ९०० रुपैयाँ संकलन भएको छ । सिडिएसका अनुसार आज अर्थात असोज ५ गते साँझ ५ः०६ बजेसम्म २ लाख १५ हजार ६४८ जना आवेदकले २ करोड ४० लाख ४७९ कित्ताका लागि आवेदन दिएका हुन् ।
हकप्रदमा असोज २२ गतेसम्म आवेदन दिन सकिनेछ । कम्पनीले भदौ १८ गतेदेखि १ः१ अनुपातमा १० करोड ५९ लाख कित्ता हकप्रद सेयर निष्काशन गरेको हो । कम्पनीले १ सय अंकित मूल्यमा १० अर्ब ५९ करोड रुपैयाँ बराबरको सेयर निष्कासन गर्नेछ । हकप्रद सेयर बिक्री प्रयोजनका लागि कम्पनीले साउन २६ गते बुक क्लोज भएको हुदाँ साउन २५ गतेसम्म कायम रहने सेयरधनीहरुले मात्र आवेदन दिन पाउनेछन् । तसर्थ, साउन २५ गतेसम्म कायम रहेका लगानीकर्ताले आवेदन दिन सक्नेछन् ।
हाल कम्पनीको चुक्ता पुँजी १० अर्ब ५९ करोड रुपैयाँ रहेको छ । हकप्रद सेयर जारी भएपछि यस कम्पनीको चुक्ता पुँजी २१ अर्ब १८ करोड रुपैयाँ पुग्नेछ । यस कम्पनीले कर्जा तिर्न र २२ मेगावाटको रोल्वालिङ खोला निर्माण गर्न हकप्रद सेयर मार्फत रकम संकलन गर्न लागेको हो ।
कम्पनीको बिक्री प्रबन्धकमा नागरिक लगानी कोष र सनराइज क्यापिटल रहेका छन् । यसका साथै धितोपत्र बोर्डबाट आस्वा अनुमति प्राप्त बैंक तथा वित्तीय संस्था र मेरो सेयरमार्फत आवेदन दिन सकिनेछ । साथै, लगानीकर्ताहरुले यी स्थानबाट पनि आवेदन दिन सक्नेछन् ।
