घोराही सिमेन्टको आइपीओमा आवेदन दिनेको ओइरो, १.४१ गुणा बढीको आवेदन, ४ अर्ब रुपैयाँ संकलन
काठमाडौं । घोराही सिमेन्ट इण्डष्ट्री लिमिटेडको आइपीओमा ४ अर्ब २६ करोड ४० लाख ७० हजार १ सय रुपैयाँ संकलन भएको छ । सिडिएसका अनुसार दोस्रो दिन साँझ ५ः०५ बजेसम्ममा २ लाख ८८ हजार ४५६ जना आवेदकबाट ९८ लाख २ हजार ४६० कित्ता शेयरको लागि आवेदन परेको हो ।
जुन माग भन्दा १.४१ गुणा बढी हो । कम्पनीले जेठ ३२ गतेदेखि सर्वसाधारणका लागि प्रिमियम आइपीओ निष्कासन तथा बिक्री खुला गरेको हो । यसअघि कम्पनीले आयोजना प्रभावित क्षेत्रका स्थानिय बासिन्दा तथा वैदेशिक रोजगारीमा रहेका नेपालीहरुका लागि निष्कासन गरि बाँडफाँट पनि गरिसेको छ । त्यसमध्ये बाँकी भएको सबै सेयर सर्वसाधारणका लागि निष्कासन गर्न लागेको हो ।
कम्पनीले प्रतिकित्ता १०० रुपैयाँ अंकित मूल्यमा ३३५ रुपैयाँ प्रिमियम थप गरी प्रतिकित्ता ४३५ रुपैयाँका दरले ६९ लाख ११ हजार ६७० कित्ता सेयर निष्कासन गर्नेछ ।
कम्पनीको आइपीओमा न्यूनतम १० कित्तादेखि अधिकतममा १० लाख कित्तासम्मका लागि आवेदन दिन सकिनेछ । सो आइपीओमा छिटोमा असार ४ गतेसम्म आवेदन दिन सकिनेछ । तोकिएको अवधिमा आवेदन नपरेको खण्डमा भने असार १४ गतेसम्म लम्बिनेछ ।
कम्पनीलाई केयर रेटिङ्ग नेपालले केयरएनपी ट्रिपल बी माइनस इस्यूअर रेटिङ्ग प्रदान गरेको छ । यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ ।
कम्पनीको आइपीओ निष्कासन तथा बिक्री प्रबन्धक हिमालयन क्यापिटल लिमिटेड र नबिल इन्भेष्टमेन्ट बैंकिङ्ग लिमिटेड रहेको छ ।
