एनआईसी एसिया बैंकलाई ५० प्रतिशत हकप्रद सेयर जारी गर्न धितोपत्र बोर्डको अनुमति

काठमाडौँ । एनआईसी एसिया बैंक लिमिटेडले हकप्रद सेयर जारी गर्नका लागि नियामक निकाय नेपाल धितोपत्र बोर्ड (सेबोन) बाट स्वीकृति प्राप्त गरेको छ। बोर्डले बैंकलाई मंगलबार (कात्तिक १७ गते) हकप्रद निष्काशनको अनुमति दिएको हो।

धितोपत्र बोर्डको निर्णयअनुसार बैंकले हाल कायम रहेको चुक्ता पुँजीको ५० प्रतिशत (१:०.५० को अनुपातमा) हकप्रद सेयर जारी गर्नेछ। यसको अर्थ, बैंकको हाल १ कित्ता सेयर रहेका सेयरधनीहरूले थप ०.५० कित्ता हकप्रद सेयरका लागि आवेदन दिन पाउनेछन्।

स्वीकृति पाएसँगै बैंकले अंकित मूल्य रु. १०० दरका कुल ७ करोड ४५ लाख ८७ हजार ८३५ कित्ता हकप्रद सेयर निष्काशन गर्नेछ। यस हकप्रद निष्काशनको कुल रकम रु. ७ अर्ब ४५ करोड ८७ लाख ८३ हजार ५०० बराबर रहनेछ।

कम्पनीको सेयर निष्काशन तथा बिक्री प्रबन्धकका रूपमा एनआईएमबी एस क्यापिटल लिमिटेड रहेको छ।