२ मंसिर २०८३, बुधबार

पूर्व अध्यक्ष गणेशलाल श्रेष्ठको निधनमा निर्माण व्यवसायी महासंघद्वारा शोक व्यक्त



काठमाडौं। नेपालको निर्माण उद्योगको विकास विस्तारमा महत्वपूर्ण योगदान दिएका नेपाल निर्माण व्यवसायी महासंघ एवं एशिया तथा पश्चिम प्रशान्त क्षेत्रका मुलुकका निर्माण व्यवसायीहरूको साझा संगठन (इफाप्का) का पूर्व अध्यक्ष गणेशलाल श्रेष्ठको निधनप्रति महासंघले शोक प्रस्ताव पारित गरेको छ।

महासंघ सचिवालयमा अध्यक्ष निकोलस पाण्डेको अध्यक्षतामा आज सम्पन्न महासंघ स्थायी समितिको बैठकले श्रेष्ठको निधन प्रति गहिरो दु:ख व्यक्त गर्दै शोक प्रस्ताव पारित गरेको हो। महासंघ अध्यक्ष निकोलस पाण्डेले श्रेष्ठको निधनबाट मुलुकको पूर्वाधार क्षेत्रमा अपूरणीय क्षति पुगेको बताए।

श्रेष्ठ वि.सं २०४७ देखि २०५४ सम्म लगातार तीन कार्याकाल तत्कालीन नेपाल निर्माण व्यवसायी संघको अध्यक्षको भूमिकामा रहेका थिए। २०५४ सालमा तत्कालीन नेपाल निर्माण व्यवसायी संघलाई महासंघमा रुपान्तरण गर्ने क्रममा समेत उनले महासंघ तदर्थ समितिको अध्यक्षको भूमिका कुशलतापूर्वक निर्वाह गरेका थिए।

नेपालले सन् १९९९ मा ऐतिहासिक रुपमा पहिलो पटक ३० औं इफाप्का सम्मेलन आयोजना गर्दा श्रेष्ठ इफाप्का अध्यक्ष रहेका थिए। श्रेष्ठको पार्थिव शरीरमा हिजो बेलुकी आर्यघाटमा महासंघका वरिष्ठ उपाध्यक्ष रामजी पन्त ‘मुकेश’ ले झण्डा ओढाउँदै भावपूर्ण श्रद्धाञ्जली अर्पण गरेका थिए।

वरिष्ठ निर्माण व्यवसायी एवं पूर्व मन्त्री विक्रम पाण्डे, महासंघका निवर्तमान अध्यक्ष रवि सिंह, पूर्व अध्यक्ष बिष्णुभाइ श्रेष्ठ, महासंघका पदाधिकारीहरू, कार्य समिति सदस्यहरू, अन्य निर्माण व्यवसायीहरू महासंघ सचिवालयमा कर्मचारीहरू लगायतले पनि पशुपति आर्यघाट पुगी श्रेष्ठप्रति श्रद्धाञ्जली अर्पण गरेका थिए। श्रेष्ठको ९१ वर्षको उमेरमा हिजो मंसिर १ गते निधन भएको थियो।