४४ हजार ४४४ नेपालीलाई निःशुल्क एआई तालिम दिँदै डिजिटल सोलुसन, मंसिर २० सम्म दर्ता खुला
काठमाडौं । डिजिटल सोलुसन प्रा.लि.ले आफ्नो चौथो वार्षिकोत्सवको अवसरमा ४४ हजार ४४४ नेपालीलाई निःशुल्क अनलाइन आर्टिफिसियल इन्टेलिजेन्स (एआई) तालिम दिने कार्यक्रम सुरु गरेको छ। ‘सबैका लागि एआई’ नाम दिइएको यस तालिम कार्यक्रममा सहभागी हुन मंसिर २० गतेसम्म अनलाइन दर्ता गर्न सकिनेछ।
वि.सं. २०७९ मंसिर १ गते रबिन पौडेलले स्थापना गरेको डिजिटल सोलुसनले चार वर्ष पूरा भएको अवसरमा एआई सम्बन्धी ज्ञान र सीप आम नेपालीसम्म पुर्याउने उद्देश्यले तालिम कार्यक्रम सञ्चालन गर्न लागेको हो। कम्पनीका संस्थापक तथा एआई प्रशिक्षक रबिन पौडेलका अनुसार उनले पछिल्लो डेढ वर्षमा १० हजारभन्दा बढी व्यक्तिलाई एआई सम्बन्धी तालिम दिइसकेका छन्। सोही अनुभवका आधारमा यसपटक ठूलो संख्यामा नेपालीलाई निःशुल्क तालिम दिने योजना बनाइएको हो।
प्राविधिक ज्ञान नभएकाले पनि सिक्न पाउने
यो तालिम कार्यक्रम विशेषगरी विद्यार्थी, शिक्षक, कर्मचारी, व्यवसायी, उद्यमी तथा अन्य सर्वसाधारणलाई लक्षित गरिएको छ। एआई सिक्नका लागि प्रोग्रामिङ वा अन्य प्राविधिक ज्ञान आवश्यक पर्ने छैन। तालिममा सहभागीले एआई के हो भन्ने आधारभूत जानकारीदेखि आफ्नो पढाइ, काम, व्यवसाय र दैनिक जीवनमा यसको प्रयोग कसरी गर्ने भन्ने कुरा सिक्न पाउनेछन्।
चार दिनमा एआईका विभिन्न टुल प्रयोग गर्न सिकाइने
तालिम कार्यक्रमअन्तर्गत चार दिनको पाठ्यक्रम तयार गरिएको छ। यसमा च्याटजीपीटी, गुगल जेमिनाई र क्लाउड जस्ता एआई टुल प्रयोग गर्ने तरिका सिकाइनेछ। त्यस्तै, एआईलाई सही निर्देशन दिने, अध्ययन तथा अनुसन्धान गर्ने, कागजात र प्रस्तुतीकरण तयार गर्ने, फोटो तथा ग्राफिक्स बनाउने र भिडियो तथा अन्य डिजिटल सामग्री तयार गर्ने सीप पनि सिकाइनेछ। यसका साथै एआई एजेन्टको परिचय, सामान्य एआई एजेन्ट बनाउने तरिका र दैनिक कामलाई सहज बनाउन यसको प्रयोग कसरी गर्ने भन्ने विषय पनि समेटिनेछ।
लाइभ र रेकर्डेड कक्षाको विकल्प
सहभागीले आफ्नो सुविधाअनुसार प्रत्यक्ष (Live) वा रेकर्ड गरिएका (Recorded) कक्षामार्फत तालिम लिन सक्नेछन्। दर्ता गर्दा नै आफूले चाहेको विकल्प छनोट गर्नुपर्नेछ। लाइभ कक्षामा सहभागी हुन नसक्नेहरूले त्यसको रेकर्ड हेरेर पनि सिक्न सक्नेछन्। यसले व्यस्त विद्यार्थी, शिक्षक, कर्मचारी तथा व्यवसायीलाई आफ्नो समयअनुसार तालिम लिन सहज बनाउने कम्पनीको अपेक्षा छ।
पेशाअनुसार छुट्टै सिकाइ सामग्री
तालिममा सहभागी हुँदा आफ्नो पेशागत पृष्ठभूमि पनि उल्लेख गर्नुपर्नेछ। सोही आधारमा विद्यार्थी, शिक्षक, कर्मचारी, व्यवसायी तथा अन्य पेशाकर्मीका लागि छुट्टाछुट्टै भिडियो सामग्री उपलब्ध गराइनेछ। सबै सहभागीले एउटै आधारभूत पाठ्यक्रम अध्ययन गर्नेछन् भने आफ्नो काम र आवश्यकताअनुसार थप भिडियोबाट पनि सिक्न सक्नेछन्।
एआई तथा प्रविधि क्षेत्रका विज्ञसँग अन्तरक्रिया
चारदिने तालिमबाहेक अभियान सुरु हुनुअघि र तालिम सम्पन्न भएपछि पनि विशेष कार्यक्रम आयोजना गरिनेछ। यी कार्यक्रममा एआई, प्रविधि तथा विभिन्न उद्योगमा काम गरिरहेका विज्ञ र अनुभवी व्यक्तिहरूसँग प्रत्यक्ष अन्तरक्रिया गर्ने अवसर दिइने कम्पनीले जनाएको छ। यस्ता सत्रमा विभिन्न पेशामा एआईको प्रयोग, यसले पार्ने प्रभाव र भविष्यमा देखिन सक्ने अवसरबारे छलफल हुनेछ।
प्रमाणपत्र पाउन ९० दिनभित्र तालिम पूरा गर्नुपर्ने
तालिम सुरु भएको मितिदेखि ९० दिनभित्र सहभागीले तोकिएको पाठ्यक्रम, अभ्यास कार्य (Assignment) र मूल्यांकन पूरा गर्नुपर्नेछ। प्रमाणपत्र पाउन मूल्यांकनमा कम्तीमा ४० प्रतिशत अंक ल्याउनुपर्नेछ। साथै, कम्पनीले तोकेका अन्य मापदण्ड पनि पूरा गर्नुपर्नेछ। तालिम कार्यक्रमको लक्ष्य ४४ हजार ४४४ जनालाई सफलतापूर्वक तालिम पूरा गराउनु र सोही संख्यामा प्रमाणपत्र प्रदान गर्नु हो।
मंसिर २० सम्म निःशुल्क दर्ता
तालिम कार्यक्रमका लागि मंसिर १ गतेदेखि अनलाइन दर्ता खुला गरिएको छ। इच्छुक नेपालीले मंसिर २० गतेसम्म निःशुल्क दर्ता गर्न सक्नेछन्। दर्ता गर्ने लिंक: https://digitalsolutionnepal.com/register/ रहेको छ।
दर्ता गर्दा आफ्नो नाम, इमेल ठेगाना, मोबाइल नम्बर, पेशा र Live वा Recorded कक्षामध्ये कुन माध्यमबाट सिक्न चाहेको हो भन्ने विवरण दिनुपर्नेछ। दर्ता पूरा भएपछि प्राप्त हुने Registration ID, इमेल ठेगाना र मोबाइल नम्बर सुरक्षित राख्न कम्पनीले अनुरोध गरेको छ। यी विवरण तालिममा सहभागी हुन आवश्यक पर्नेछन्।
मंसिर २१ गते तालिमबारे थप जानकारी सार्वजनिक हुने
कम्पनीका अनुसार तालिम सञ्चालन हुने तरिका, सिकाइ प्लेटफर्म र कक्षामा सहभागी हुने प्रक्रियाबारे मंसिर २१ गते थप जानकारी सार्वजनिक गरिनेछ। दर्ता गरेका सहभागीलाई आवश्यक जानकारी इमेलमार्फत पठाइनेछ। साथै, कम्पनीको आधिकारिक वेबसाइट तथा सामाजिक सञ्जालबाट पनि नियमित जानकारी उपलब्ध गराइनेछ।
यसअघि शुल्क लिएर एआईतालिम सञ्चालन गर्दै आएको डिजिटल सोलुसनले आफ्नो चौथो वार्षिकोत्सवमा उक्त तालिम निःशुल्क रूपमा आम नेपालीसम्म पुर्याउन लागेको हो।
चार वर्षदेखि डिजिटल शिक्षा र प्रविधिमा सक्रिय
पोखरामा स्थापना भएको डिजिटल सोलुसनले विगत चार वर्षदेखि डिजिटल सेवा, प्रविधि तथा डिजिटल साक्षरतासम्बन्धी जानकारी र तालिम प्रदान गर्दै आएको छ। कम्पनीका अनुसार डिजिटल सोलुसन र यसका संस्थापक रबिन पौडेलका सामाजिक सञ्जालमा गरी ६ लाखभन्दा बढी फलोअर तथा सब्सक्राइबर छन्। ‘सबैका लागि एआई’ अभियानमार्फत नेपालीलाई नयाँ प्रविधिसँग परिचित गराउने र पढाइ, काम, व्यवसाय तथा दैनिक जीवनमा एआईको प्रयोग बढाउन सहयोग गर्ने कम्पनीको लक्ष्य छ।















