एक्सेल डेभलपमेन्ट बैंकको साधारण सभा आज हुँदै, लाभांश पारितसहित यस्ता छन् अन्य एजेण्डा
काठमाडौं । एक्सेल डेभलपमेन्ट बैंकको वार्षिक साधारणसभा आज हुँदै छ । एक्सेल डेभलपमेन्ट बैंकको १५ औँ वार्षिक साधारणसभा आज (असोज १६ गते, शनिबार) हुुँदै छ । बैंकको भदौ २२ गते बसेको सञ्चालक समितिको बैठकले वार्षिक साधारणसभा असोज १६ गते बोलाएको थियो । सभा झापाको बिर्तामोडस्थित सिद्धार्थ होटेलमा बिहान ११ बजेबाट हुँदैछ ।
बैंकको वार्षिक साधारण सभामा आर्थिक वर्ष २०७६–७७ को चुक्ता पुँजीको १२ प्रतिशत बोनस सेयर पारित गर्नेछ । त्यस्तै, बोनस सेयरको कर प्रयोजनका लागि छुट्याइएको ५१ लाख २२ हजार ८७०.८९ रुपैयाँ बराबरको नगद लाभांश वितरणको प्रस्ताव पारित गर्नेछ ।
त्यस्तै, सभाले उल्लेखित बोनस शेयर निष्कासनका लागि आवश्यक हदसम्म जारी तथा चुक्तापुँजी वृद्धि गर्न स्वीकृति प्रदान गर्नेछ ।
त्यस्तै, सभाले अन्य उपयुक्त बैंक तथा वित्तीय संस्थासँग आपसमा गाभ्ने, गाभिने र प्राप्ति प्रयोजनका लागि आवश्यक सम्पूर्ण कार्य गर्ने अख्तियारी सञ्चालक समितिलाई प्रदान गर्ने विशेष प्रस्ताव पनि पारित गर्नेछ ।
बैंकले लाभांश र सभा प्रयोजनका लागि बैंकले असोज १ गतेदेखि असोज १६ गतेसम्म बुक क्लोज गर्ने निर्णय गरेको छ । त्यसैले भदौ ३१ गतेसम्म कायम सेयरधनीहरु मात्र लाभांश पाउन र सभामा भाग लिन पाउनेछन् ।
