मौद्रिक नीतिबारे छलफल गर्न एनबीएको बैठक पोखरामा, गभर्नरसहित सबै बैंकका सीईओलाई बोलाइयो
काठमाडौं । वाणिज्य बैंकको सीईओहरुको संगठन नेपाल बैंकर्स एशोसियनको बैठक पोखरामा बस्ने भएको छ । बैंकर्स संघको बैठक असार १७ गते २ बजेदेखि पोखरामा शुरु हुने भएको हो ।
शुक्रबार हुने बैंकर्स संघको बैठक तथा छलफल कार्यक्रममा राष्ट्र बैंकका गभर्नर महाप्रसाद अधिकारी, डेपुटी गभर्नरद्वय डा. निलम ढुंगाना तिम्सिना र बम बहादुर मिश्रलाई समेत बोलाईएको छ । बैठकले मौद्रिक नीतिका बारेमा छलफल गरी राष्ट्र बैंकलाई सुझाव समेत दिने भएको हो ।
मौद्रिक नीतिको बिषयमा छलफल गर्न र डिजीटल करेन्सीबारे छलफल हुने नेपाल बैंकर्स एसोसिएसनले जनाएको छ । नेपाल राष्ट्र बैंकले आफ्नै डिजिटल करेन्सी संचालन गर्ने तयारी गरेको छ । सोही विषयमा समेत उक्त कार्यक्रममा छलफल हुने भएको हो ।
छलफल कार्यक्रममा नेपाल राष्ट्र बैंकका गभर्नर, डेपुटी गभर्नर, वाणिज्य बैंकका सीईओहरु र वाणिज्य बैंकका गण्डकी प्रदेश प्रमुहरुलाई बोलाईएको एक बैंकका सीईओले अर्थपथलाई जानकारी दिए ।
‘यो एनबीएको नियमित बैठक हो । राष्ट्र बैंकका गभर्नरसँग मौद्रिक नीतिका बारेमा बैंकले दिने सुझावमा छलफल गरिनेछ ।’ एक सीईओले भने, ‘राष्ट्र बैंकले संचालन गर्ने डीजीटल करेन्सीबारे अरु देशको अनुभवसहितको सीईओ सुनिल पोखरेलले प्रस्तुतिकरण दिनेछन् ।’
