विकास बैंकहरुको प्रोफिट: नाफा वृद्धिमा कामना सेवा र लुम्बिनी खप्पिस, कसले कति कमाए ?
काठमाडौं । राष्ट्रिय स्तरका वाणिज्य बैंकहरले तीन महिनामा कुल १ अर्ब बढी नाफा कमाएका छन् । संचालनमा रहेका ८ वटा राष्ट्रिय स्तरका विकास बैंकहरुले सार्वजनिक गरेको चालु आर्थिक वर्ष २०८०/८१ को पहिलो त्रैमासिक वित्तीय विवरणले यस्तो देखाएको हो ।
समिक्षा अवधिमा बैंकहरुले १ अर्ब १० करोड ७५ लाख ८६ हजार रुपैयाँ खुद नाफा कमाएका हुन् । तर, गत आवको सोही अवधिको तुलनामा भने सामान्य (०.९४ प्रतिशत) मात्रै बढी हो । गत आवको असोज मसान्तमा पनि बैंकहरुले कुल १ अर्ब ९ करोड ७२ लाख ५१ हजार रुपैयाँ खद नाफा कमाएका थिए ।
विवरणअनुसरा तीन वटाको नाफा बढेको छ भने अन्य पाँच वटा विकास बैंकको नाफामा गिरावट देखिएको छ । समिक्षा अवधिमा कामना सेवा, लुम्बिनी विकास र गरिमा विकास बैंकको नाफा बढेको छ । तर, मुक्तिनाथ, शाइन रेसुङ्गा, महालक्ष्मी विकास, ज्योति विकास र सांग्रिला डेभलपमेन्ट बैंकको नाफा घटेको छ ।
नाफा बढाउन कामना सेवा खप्पिस, लुम्बिनी पनि अगाडी
समिक्षा अवधिमा सबैभन्दा धेरै नाफा कामना सेवा विकास बैंकले बढाएको छ । गत वर्षको असोज मसान्तसम्ममा बैंकले कुल ४ करोड १५ लाख ६१ हजार रुपैयाँ नाफा कमाएको थियो । तर, चालु आवको सोही अवधिमा आइपुग्दा भने बैंकले ११ करोड ९५ लाख २१ लाख रुपैयाँ नाफा कमाएको छ । जुन गत वर्षको तुलनामा १८७.५८ प्रतिशतले बढी हो ।
यस्तै, नाफा वृद्धिमा लुम्बिनी विकास बैंक पनि अगाडि नै देखिएको छ । समिक्षा अवधिमा बैंकको नाफा १४३.९६ प्रतिशतले वृद्धि भई १७ करोड ३२ लाख ८० हजार रुपैयाँ कायम भएको छ । गत आवको पहिलो त्रैमासमा कम्पनीले ७ करोड १० लाख २९ हजार रुपैयाँ मात्रै नाफा कमाएको थियो ।
यता, गरिमा विकास बैंकले पनि नाफा वृद्धि गरेको छ । गत वर्षको पहिलो त्रैमासमा बैंकले १९ करोड ३३ लाख २८ हजार रुपैयाँ नाफा कमाएको थियो । तर, यस वर्षको सोही अवधिमा भने बैंकले ४.२५ प्रतिशत बढाएर खुद नाफा २० करोड १५ लाख पुर्याएको छ । बैंकको यो नाफा रकमका आधारमा भने दोस्रो धेरै हो ।
रकमका आधारमा भने मुक्तिानाथको धेरै नाफा, अन्य कसले कति कमाए ?
गत वर्षको पहिलो त्रैमासको तुलनामा मुक्तिनाथ विकास बैंकको नाफामा २५.५७ प्रतिशतको गिरावट देखिएको छ । बैंकले गत वर्षको असोजमा ३० करोड ७४ लाख १५ हजार रुपैयाँ खुद नाफा कमाएको थियो । तर, यस वर्षको सोही अवधिमा भने २२ करोड ८८ लाख रुपैयाँमा सिमित भएको छ । यद्यपि, यो रकमको आधारमा भने सबैभन्दा धेरै हो । अर्थात् सबैभन्दा धेरै नाफा कमाउने बैंक भने मुक्तिनाथ विकास नै रहेको छ ।
मुख्य वित्तीय सूचकमा अब्बल मानिने शाइन रेसुङ्गाको नाफा पनि पहिलो त्रैमासमा ८.३६ प्रतिशतले घटेको छ । चालु आवको पहिलो त्रैमासमा बैंकले १९ करोड १६ लाख ५४ हजार रुपैयाँ नाफा कमाएको छ । गत वर्षको सोही अवधिमा भने बैंकले २० करोड ९१ लाख रुपैयाँ नाफा कमाएको थियो ।
यस्तै, महालक्ष्मी विकास बैंकको नाफामा पनि २०.०८ प्रतिशतको गिरावट आई ९ करोड ५३ लाख रुपैयाँ कायम भएको छ ।
यता, ज्योति विकास बैंकको नाफा पनि ४९.२५ प्रतिशतले घटेर ५ करोड ७८ लाख रुपैयाँ र सांग्रिला डेभलपमेन्ट बैंकको १५.८२ प्रतिशतले घटेर ४ करोड ६५ लाख रुपैयाँ कायम भएको छ ।
