महालक्ष्मी विकास बैंकले कमायो साढे ९ करोड नाफा, कस्तो छ वित्तीय अवस्था ?
काठमाडौं । महालक्ष्मी विकास बैंकले साढे ९ करोड खुद नाफा कमाएको छ । बैंकले बुधवार प्रकाशन गरेको चालु आर्थिक वर्ष २०८१–८२ को पहिलो त्रैमासिक वित्तीय विवरणले यस्तो देखाएको हो ।
समिक्षा अवधिमा बैंकले ९ करोड ४२ लाख ८९ हजार रुपैयाँ खुद नाफा कमाएको छ ।तर, गत आवको पहिलो त्रैमासको तुलनामा भने बैंकको नाफा सामान्य (१.१४ प्रतिशत) घटेको छ । गत आवको सोही अवधिमा पनि बैंकले ९ करोड ५३ लाख ७८ हजार रुपैयाँ खुद नाफा कमाएको थियो ।
तर, बैंकको खुद ब्याज आम्दानी भने ९.५१ प्रतिशत बढेर ४८ करोड ३२ लाख ११ हजार रुपैयाँ पुगेको छ । गत आवको असोज मसान्तसम्ममा बैंकको यस्तो आम्दानी ४४ करोड १२ लाख २५ हजार रुपैयाँ मात्रै थियो ।
यता, बैंकको संचालन नाफा भने २.५५ प्रतिशत गिरावट देखिएको छ । गत आवको पहिलो त्रैमासमा बैंकको यस्तो नाफा १३ करोड ९२ लाख ६६ हजार रुपैयाँ रहेको थियो । तर, चालु आवको सोही अवधिमा आइपुग्दा घटेर १३ करोड ५७ लाख १३ हजार रुपैयाँ कायम भएको छ । बैंकको खुद संचालन नाफा भने सामान्य बढेर ३९ करोड ८० लाख ६९ हजार रुपैयाँ कायम भएको छ ।
समिक्षा अवधिमा बैंकको वितरणयोग्य नाफा भने २१ करोड ४१ लाख ९० हजार रुपैयाँ रहेको छ ।
हाल बैंकको खराब कर्जा ४.९० प्रतिशत रहेको छ । बैंकको प्रतिसेयर आम्दानी (इपिएस) ९.०४ रुपैयाँ र प्रतिसेयर नेटवर्थ १६३.४८ रुपैयाँ रहेको छ ।
हाल बैंकको चुक्ता पुँजी ४ अर्ब १७ करोड १३ लाख १८ हजार रुपैयाँ छ । बैंकले जेगडा कोषमा भने २ अर्ब ४३ करोड ३६ लाख २३ हजार रुपैयाँ राखेको छ ।
सो अवधिमा आइपुग्दा बैंकले ५२ अर्ब ५५ करोड ३७ लाख ५२ हजार रुपैयाँ निक्षेप संकलन गरि ४० अर्ब ९३ करोड ६५ लाख रुपैयाँ कर्जा लगानी गरेको छ।
