सरकारले बजेटमा राखेको १ करोड अनुदान सेजनद्वारा अस्वीकार
काठमाडौँ । नेपाल आर्थिक पत्रकार समाज (सेजन) ले आगामी आर्थिक वर्ष २०८२/८३ को बजेटमार्फत सरकारले उपलब्ध गराएको रू. १ करोड अनुदान नलिने निर्णय गरेको छ ।
सञ्चार तथा सूचना प्रविधि मन्त्रालयको आगामी आवको वार्षिक विकास कार्यक्रममा सेजनलाई सञ्चालन अनुदान बापत एक करोड रुपैयाँ विनियोजन गरेको उल्लेख छ ।
सेजनको मंगलबार बसेको कार्यसमिति बैठकले अनुदान अस्वीकार गर्ने निर्णय गरेको हो ।
‘सेजनले सञ्चार मन्त्रालयसँग यस प्रकारको कुनै पनि बजेट माग गरेको छैन र हालसम्म त्यस मन्त्रालयबाट कुनै पनि निःशर्त अनुदान लिइएको छैन,’ अध्यक्ष ओलीले भने ।
विनियोजन कुशलता, बजेट अनुशासन एवम् वित्तीय स्रोत उपयोगको प्रभावकारिताबारे सरकार तथा मातहतका निकायहरुमाथि निरन्तर खबरदारी गर्दै आएको परिप्रेक्ष्यमा ठूलो रकम निःशर्त अनुदान स्वीकार गर्नु आफ्नै विरासत र संस्थागत मौलिकताको समेत विपरित हुने देखिएको सेजनले जनाएको छ ।
‘वित्तीय स्रोतको अभाव झेलिरहेको हाम्रो सरकारका लागि नागरिकको आधारभूत आवश्यकता र जीवन रक्षामा ठूलो लगानी गर्नुपर्ने आवश्यकता छ’, सेजनले जारी गरेको वक्तव्यमा भनिएको छ, ‘जनताको करबाट प्राप्त स्रोतको नागरिक हितमा अधिकतम उपयोग गर्न सक्ने विकल्प छाडेर जिम्मेवार पत्रकारहरुको छाता संस्थाले बजेट उपयोग गर्नु हाम्रो पेशागत धर्म र मर्यादाको समेत खिलाफ हुन जान्छ ।’
