बन्ने भयो लगानी सम्मेलनको ड्रिम प्रोजेक्ट ‘रारा रिसोर्ट’, २ अर्ब लगानी
काठमाडौँ । सरकारले आयोजना गरेको तेस्रो लगानी सम्मेलनको समयमा सम्झौता भएको नेपालकै ड्रिम प्रोजेक्ट रारा रिसोर्ट निर्माण प्रक्रिया अघि बढेको छ ।
अष्ट्रेलियन लगानीमा मुगुको रारा ताल नजिकैको निकुञ्ज क्षेत्रमा निर्माण हुन लागेको सुविधासम्पन्न रिसोर्ट खोल्न सरकारले प्रारम्भिक वातावरणीय मूल्यांकन (आईईई) स्वीकृत गरेको छ ।
यससँगै अब परियोजनाको भौतिक निर्माण थाल्ने गरी प्रक्रिया अघि बढाउन बाटो खुलेको हो । उक्त रिसोर्ट निर्माणका लागि पर्यटन विभागले सोमबार स्वीकृति प्रदान गरेको हो । विभागले रारा क्षेत्रमा १९ वटा भवन बनाएर ६२ कोठा र ९८ शैय्या क्षमताको लक्जरी रिसोर्ट निर्माणका लागि अनुमति प्रदान गरेको हो ।
अष्ट्रेलियाको एक्सपर्ट ग्र्रुप र नेपालको रारा होल्डिङ्स रिसोर्ट प्रालिको संयुक्त लगानीमा बन्न लागेको उक्त होटलको लागत करिव २ अर्ब रुपैयाँ रहनेछ । अष्ट्रेलियाका एक्सपर्ट ग्रुपको मूख्य लगानी रहने उक्त रिसोर्टमा नेपाली साझेदारका रुपमा रारा होल्डिङ्सका तर्फबाट अभिषेकविक्रम शाहले नेतृत्व गर्नेछन् ।
उक्त रिसोर्ट मुगु जिल्लाको छायाँनाथ रारा नगरपालिका वडा नं ९, मुर्माटपमा ८० रोपनी क्षेत्रफलमा बन्न लागेको हो । डेढ वर्षभित्र निर्माण सम्पन्न गरिसक्ने लक्ष्य राखिएको रिसोर्ट स्थानीय स्रोतसाधनको प्रयोग र त्यहाँको संस्कृति झल्किने गरी निर्माण गर्न विस्तृत परियोजना प्रतिवेदन तयार भएको संचालक शाहले बताए ।
‘भर्खरै मात्र पर्यटन विभागले रिसोर्ट निर्माणका लागि आईईई स्वीकृति प्रदान गरेको छ,’ शाहले भने, ‘अब केही समयभित्रै थप प्रक्रिया पुरा गरी निर्माणको चरणमा प्रवेश गर्नेछौँ ।’ साथै उक्त रिसोर्ट निर्माणसँगै रारा क्षेत्रको विकासमा कोशेढुंगा सावित हुने स्थानीय सरोकारवालाहरु बताउँछन् ।
