अत्याधुनिक प्रविधि र जेमिनी एआईसहित मोटोरोला सिग्नेचर-२७ बजारमा

मोटोरोलाले अहिलेसम्मकै अत्याधुनिक मानिएको ‘सिग्नेचर २७’ स्मार्टफोन सार्वजनिक गरेको छ, जसमा २०० मेगापिक्सेल क्यामेरा, जेमिनी एआई र ७००० एमएएच क्षमताको शक्तिशाली ब्याट्री जडान गरिएको छ।

काठमाडाैँ । स्मार्टफोन बजारमा आफ्नो पकड बलियो बनाउँदै आएको मोटोरोलाले आफ्नो पछिल्लो फ्ल्यागशिप मोडल ‘मोटोरोला सिग्नेचर २७’ भारतीय बजारमा सार्वजनिक गरेको छ। गएको बिहीबार एक औपचारिक घोषणासहित सार्वजनिक गरिएको यो डिभाइसलाई कम्पनीले हालसम्मकै सबैभन्दा उन्नत स्मार्टफोनको रूपमा प्रस्तुत गरेको छ।

यस नयाँ फोनमा २०० मेगापिक्सेलको पेरिस्कोप टेलिफोटो क्यामेरा, गुगलको जेमिनी एआई फिचर, उच्च ब्राइटनेसयुक्त डिस्प्ले र ७००० मिलिएम्पिर आवर (एमएएच) को विशाल ब्याट्री उपलब्ध गराइएको छ।

यसका साथै यसमा १०० गुणा जुम क्षमता, ग्राफिनओएस समर्थन गर्ने र सात वर्षसम्म अपरेटिङ सिस्टम अपग्रेडको सुविधा दिइएको छ। आगामी केही महिनाभित्रै विश्व बजारमा भित्रिने यो फोनको सुरुवाती मूल्य १५९९ अमेरिकी डलर तोकिएको छ।

नयाँ मोटोरोला सिग्नेचर २७ मा चारवटा क्यामेरा जडान गरिएको छ। यसमा ५० मेगापिक्सेलको सोनी एलिटिया एल९१० मुख्य सेन्सर, १०० गुणा सुपर जुमयुक्त २०० मेगापिक्सेलको पेरिस्कोप टेलिफोटो क्यामेरा, ५० मेगापिक्सेलको अल्ट्रावाइड क्यामेरा र ५० मेगापिक्सेलको फ्रन्ट क्यामेरा समावेश छन्।

मोटोरोलाका अनुसार यो क्यामेरा प्रणालीले उत्कृष्ट फोटोग्राफीका लागि डीएक्सओएमार्क गोल्ड लेबल प्राप्त गरेको छ र सन् २०२६ मा लञ्च भएका अन्य एन्ड्रोइड तथा आईओएस डिभाइसहरूलाई पछि पार्दै उच्च स्थान हासिल गरेको छ। यसबाहेक, फोनमा १२ हजार निट्ससम्मको पिक ब्राइटनेस दिन सक्ने ‘एक्सट्रिम एमोलेड डुओ’ ट्यान्डम डिस्प्ले राखिएको छ।

क्यामेरा र फोटोग्राफीका विशेषता

नयाँ मोटोरोला फ्ल्यागशिपको सबैभन्दा आकर्षक पक्ष यसको क्यामेरा सेटअप हो। यसको २०० मेगापिक्सेल पेरिस्कोप टेलिफोटो क्यामेराले १००x सुपर जुम प्रोलाई समर्थन गर्ने हुनाले टाढाका दृश्यहरू पनि सहजै क्याप्चर गर्न सकिन्छ। साथै, यसको ३x पेरिस्कोप लेन्सले प्राकृतिक देखिने पोट्रेट तस्बिरहरू खिच्न मद्दत गर्छ।

५० मेगापिक्सेलको मुख्य क्यामेरामा सोनीको एलिटिया एल९१० सेन्सर र एलओएफआईसी प्रविधि प्रयोग गरिएको छ, जसले कमजोर प्रकाश भएका ठाउँमा पनि उज्यालो र सन्तुलित भिडियोहरू तयार पार्छ।

फोनमा विशेष इभिएस एक्सन सेन्सर पनि राखिएको छ, जसले तीव्र गतिमा हलचल गर्ने वस्तुहरूलाई समेत उच्च स्पष्टता र डिटेलसहित कैद गर्न सहयोग पुर्‍याउँछ।

भिडियो रेकर्डिङका लागि यसले डल्बी भिजनलाई समर्थन गर्छ भने एआईमा आधारित भिडियो इन्स्यान्समेन्ट इन्जिनले रङ, कन्ट्रास्ट र डाइनामिक रेन्जलाई स्वतः व्यवस्थित बनाउँछ। यसको ५० मेगापिक्सेलको फ्रन्ट क्यामेराबाट फोके भिडियो रेकर्ड गर्न सकिन्छ।

१२ हजार निटको डिस्प्ले र शक्तिशाली प्रोसेसर

मोटोरोला सिग्नेचर २७ मा अत्याधुनिक ट्यान्डम प्रविधिमा आधारित ‘एक्सट्रिम एमोलेड डुओ’ डिस्प्ले प्रयोग गरिएको छ। यसले दुईवटा इमिभिएव तहलाई जोडेर ब्राइटनेस, रङको शुद्धता र ऊर्जा दक्षतामा सुधार ल्याउँछ।

यो प्यानलले १२ हजार निट्ससम्मको पिक ब्राइटनेस, १.५ के रिजोल्युसन र डल्बी भिजनको सुविधा दिन्छ। कम्पनीको दाबी अनुसार यो डिस्प्लेले परम्परागत एमोलेड प्यानलको तुलनामा ३४ प्रतिशत बढी ऊर्जा बचार्नुका साथै १२१ प्रतिशतसम्म लामो आयु प्रदान गर्दछ।

कार्यसम्पादनका लागि यो स्मार्टफोनमा क्वालकमको ‘स्न्यापड्र्यागन ८ एलिट एक्सट्रिम जेन ६ मोवाइल प्लेटफर्म’ जडान गरिएको छ। भारी र धेरै ऊर्जा खपत गर्ने कार्य गर्दा फोन तात्न नदिन मोटोरोलाले यसमा ‘आर्कटिकमेस’ कुलिंग सिस्टम राखेको छ, जसको थर्मल च्याम्बर अघिल्लो पुस्ताभन्दा ४० प्रतिशत ठूलो छ।

यस डिभाइसले छ वटा एन्टेना डिजाइन र वाइफाइ ८ को अनुकूलतामार्फत दुई गुणासम्म छिटो वाइफाइ गति दिने दाबी गरिएको छ।

जेमिनी एआई र नयाँ स्मार्ट सुविधा

मोटोरोला सिग्नेचर २७ लाई विशेष रूपमा जेमिनी इन्टेलिजेन्सका लागि तयार पारिएको छ, जसले गुगलका उन्नत एआई सुविधाहरू सीधा प्रयोगकर्ताको हातमा पुर्‍याउँछ। यसै क्रममा कम्पनीले केही नयाँ एआई उपकरणहरू पनि भित्र्याएको छ।

उदाहरणका लागि, ‘र्‍याम्ब्लर’ ले मानिसले बोलेका कुराहरूबाट अनावश्यक शब्दहरू हटाएर, दोहोरिएका वाक्यहरू सच्याएर र अर्थपूर्ण अनुच्छेद वा बुँदाहरूमा रूपान्तरण गरेर चिटिक्क परेको सन्देश तयार पार्छ।

त्यस्तै, ‘साइन-टु-टेक्स्ट’ फिचरले अगाडिको क्यामेराको प्रयोग गरेर साङ्केतिक भाषालाई वास्तविक समयमै लिखित अंग्रेजीमा अनुवाद गर्न सक्छ। यसबाहेक, प्राकृतिक कुराकानीकै भरमा भिडियोहरू सिर्जना र सम्पादन गर्न गुगलको जेमिनी ओम्नी तथा विभिन्न प्रम्प्टहरूको सहायताले साउन्डट्र्याक जेनेरेट गर्न लिरिया फिचरलाई पनि फोनमा स्थान दिइएको छ।

७००० एमएएच ब्याट्री

यस फोनमा ७००० मिलिएम्पिर आवर (एमएएच) क्षमताको विशाल ब्याट्री दिइएको छ, जुन अघिल्लो पुस्ताको तुलनामा ३५ प्रतिशतले ठूलो हो। यसले ९० वाटको टर्बोपावर तारयुक्त चार्जिङ र ५० वाटको ताररहित चार्जिङलाई समर्थन गर्छ। कम्पनीका अनुसार जम्मा १२ मिनेट मात्र चार्ज गर्दा पनि दिनभरका लागि पुग्ने ब्याट्री ब्याकअप प्राप्त गर्न सकिन्छ।

अडियोका पारखीहरूका लागि यसमा बेङ एन्ड ओलुफसेनको प्रविधि जडान गरिएको छ। मोटोरोलाका अनुसार बजारमा यो अडियो ब्रान्डको प्रविधि प्रयोग भएको यो नै पहिलो स्मार्टफोन हो।

फोनलाई बलियो बनाउन कर्निंग गोरिल्ला ग्लास सेरामिक ३, एरोस्पेस-ग्रेड एल्युमिनियम फ्रेम र सैन्य-ग्रेड स्थायित्व प्रमाणपत्र प्रयोग गरिएको छ। साथै, धुलो र पानीबाट सुरक्षाका लागि यसले आईपी६८ र आईपी६९ को रेटिङ पनि पाएको छ।

ग्राफिनओएस समर्थन

सुरक्षालाई उच्च प्राथमिकता दिँदै मोटोरोलाले आफ्नो यो पहिलो स्मार्टफोनमा ग्राफिनओएसलाई समर्थन दिने भएको छ। एन्ड्रोइड ओपन सोर्स प्रोजेक्टमा आधारित यो एक सुरक्षा-केन्द्रित खुला स्रोत अपरेटिङ सिस्टम हो, जसलाई कम्पनीले ग्राफिनओएस फाउन्डेसनसँगको सहकार्यमा विकास गरिरहेको छ।

मोटोरोलाले आगामी केही महिनाभित्रै यो स्मार्टफोन विश्वव्यापी बजारमा उपलब्ध हुने जनाएको छ। प्रारम्भिक खुद्रा मूल्य १५९९ अमेरिकी डलर तोकिए पनि भारतीय बजारमा यसको मूल्य र उपलब्धता कहिले हुन्छ भन्ने बारेमा भने कम्पनीले हालसम्म केही खुलाएको छैन।

भारतीय बजारमा पुगेपछि नेपाली बजारमा पनि छिट्टै याे फाेन भित्रिने संभावना छ । तर यसकाे मूल्य कम्तिमा पनि साढे २ लाख पर्ने देखिएपछि याे प्रिमियम फाेन नेपाली बजारमा भने ज्यादा विक्री नहुने संभावना छ ।