चाडपर्वमा गिफ्ट होइन ग्यारेन्टी दिऔं, यसरी बनाऔं दिदीबहिनीको तिहार सुरक्षित र अर्थपूर्ण

तिहारमा दिदीबहिनीलाई परम्परागत उपहारको सट्टा जीवन बीमालेख उपहार दिएर दीर्घकालीन सुरक्षा र आत्मीयता झल्काउने नयाँ संस्कारको थालनी गर्न सकिन्छ।

काठमाडाैँ । नेपालीहरूको महान चाड तिहार उज्यालो, रङ, मिठास र आत्मीय सम्बन्धहरूको अनुपम संगम हो। दसैंपछिको यो दोस्रो ठूलो पर्व केवल केही दिनको उल्लास र परम्परागत औपचारिकतामा मात्र सीमित छैन, यो त आपसी सम्बन्धलाई अझ प्रगाढ बनाउने एउटा विशेष अवसर पनि हो।

विशेषगरी, तिहारको मुख्य दिन मानिने भाइटीकामा दाजुभाइ र दिदीबहिनीबीच स्नेह, श्रद्धा र संरक्षणको पवित्र आदानप्रदान हुन्छ।

सप्तरंगी टीका, मखमलीको माला, हातले बनाएका परिकार अनि गच्छे अनुसार दिइने दक्षिणा तथा उपहारले यो सम्बन्धलाई जीवन्त राख्दै आएको छ। तर, बदलिँदो समयसँगै हाम्रा सोच र परम्परालाई पनि भविष्यप्रति उत्तरदायी बनाउनुपर्ने बेला आएको छ।

क्षणिक उपहार हाेइन, दीर्घकालीन सुरक्षा

चाडपर्वका बेला हामी सामान्यतया घडी, लत्ताकपडा, विभिन्न ग्याजेट वा सजावटका सामानहरू किनेर उपहार दिने गर्छौं। यी वस्तुहरू केही समयका लागि मात्र काम लाग्छन् र समयसँगै पुराना वा काम नलाग्ने हुन्छन्।

तर, जीवनमा आइपर्ने विभिन्न चुनौतीपूर्ण घडीहरूमा साथ दिने बलियो आधार भनेको आर्थिक सुरक्षा हो। दाजुभाइले दिदीबहिनीको दीर्घायु र सुखको कामना त गर्छन्, तर त्यो कामनालाई वास्तविक सुरक्षाको कवचमा बदल्न सकियो भने त्यो उपहार अझ अर्थपूर्ण बन्छ।

यसपटकको तिहारबाटै दिदीबहिनीलाई कुनै पनि राम्रो जीवन बीमालेख उपहार दिने प्रचलन बसाल्न सके त्यसले उनीहरूको भविष्यलाई सुरक्षित बनाउन मद्दत गर्छ।

संस्कार र सोचाइमा आधुनिकीकरण

भाइटीकाको दिन दक्षिणा दिने चलन पुरानै हो। बालबालिकादेखि ठूलासम्मलाई दिइने त्यस्तो रकम वा सामान्य खर्च हुने वस्तुको सट्टा यदि त्यही रकम जोडेर वा थप गरेर एउटा लघुबीमा वा जीवन बीमा पोलिसी खरिद गरिदिने हो भने त्यो कति सुरक्षित र अनुपम होला?

पश्चिमा मुलुकहरूमा जन्मदिन, विवाह वा विभिन्न चाडपर्वका अवसरमा बीमालेख उपहार दिने संस्कृति तीव्र रूपमा बढ्दै गएको छ। यो केवल सांस्कृतिक रूपान्तरण मात्र नभई एक सचेत नागरिकको दूरदर्शिता पनि हो।

वृद्ध आमाबुवा, अविवाहित दिदीबहिनी वा परिवारका अन्य सदस्यको नाममा बीमा पोलिसी किनिदिँदा त्यसले भोलिका दिनमा पर्ने सम्भावित जोखिमहरू विरुद्ध बलियो ढालको काम गर्छ।

भरोसाको उपहार

बीमालाई धेरैले केवल पैसा वा नाफा-घाटाको हिसाबले मात्र हेर्ने गरेका छन्। तर, यो केवल आर्थिक कारोबार नभई कठिन परिस्थितिमा जीवन बचाउने एउटा भरपर्दो माध्यम हो।

कपडा फाट्छ, ग्याजेट बिग्रन्छ र मिठाइ सकिन्छ, तर बीमालेख यस्तो उपहार हो जोसँगै एउटा सुरक्षित भविष्य जोडिएको हुन्छ। यसपालिको तिहारमा झिलिमिली बत्तीको उज्यालोसँगै दिदीबहिनीको मुहारमा स्थायी मुस्कान ल्याउने गरी भविष्यको ग्यारेन्टी उपहार दिने अभ्यास थालनी गर्न सकिन्छ।

यो सानो कदमले पर्वलाई केवल परम्परामा मात्र सीमित नराखी जीवनमा सकारात्मक परिवर्तन ल्याउने गतिलो माध्यम बनाउनेछ।