कर्पोरेट डेभलपमेन्ट बैंकको हकप्रद आजदेखि बिक्री खुला, क–कसले आवेदन दिन पाउँछन् ?
काठमाडौं । कर्पोरेट डेभलपमेन्ट बैंक लिमिटेडको हकप्रद शेयर आज (माघ ७ गते, शुक्रबार) देखि बिक्री खुला गरिएको छ । बैंकले ३० करोड रुपैयाँ बराबरको हकप्रद शेयर आजदेखि निष्काशन तथा बिक्री खुला गरेको हो ।
बैंकले हाल कायम १ कित्ता शेयर बराबर नयाँ १.५ कित्ता शेयरको अनुपातमा हकप्रद शेयर निष्काशन तथा बिक्री खुला गरेको हो । बैंकले १ सय रुपैयाँ अंकित दरका ३० करोड रुपैयाँ बराबरको ३० लाख कित्ता हकप्रद बिक्री खुला गरेको हो ।
बैंकको हकप्रद शेयरको बिक्री प्रबन्धक सिभिल क्यापिटल मार्केट लिमिटेड रहेको छ । हकप्रदमा सिभिल क्यापिटल तथा कर्पोरेट डेभलपमेन्ट बैंकका रजिष्टर्ड तथा सम्पूर्ण शाखा कार्यालयबाट आवेदन दिन सकिनेछ । साथै धितोपत्र बोर्डबाट आश्वा अनुमति प्राप्त बैंक तथा वित्तीय संस्थाका अलवा मेरोशेयर सफ्टवेयर मार्फत आवेदन दिन सकिन्छ ।
बैंकको हकप्रद शेयरमा माघ २७ गतेसम्म आवेदन दिन सकिनेछ । क्रेडिट रेटिङ एजेन्सी केयर रेटिङ्ग नेपालले बैंकलाई केयरएनपी बी प्लस आईएस रेटिङ्ग प्रदान गरेको छ । यसले वित्तीय दायित्व पुरा गर्न उच्च जोखिममा रहेको संकेत गर्दछ ।
बैंकले हकप्रद निष्काशन प्रयोजनार्थ पौष २६ गते बुकक्लोज गरेको थियो । त्यसैले पौष २५ गतेसम्म नेप्सेमा कारोबार भइ कायम शेयरधनीहरुले मात्र उक्त हकप्रदमा आवेदन दिन सक्नेछन् ।
