खप्तड लघुवित्तको आइपीओमा करिब १०० गुणा बढीको आवेदन

अर्थ पथ

प्रकाशित मिति : १० भाद्र २०७९, शुक्रबार

काठमाडौं । खप्तड लघुवित्तको आइपीओमा करिब १०० गुणा बढीको आवेदन परेको छ । सीडीएसका अनुसार शुक्रबार बिहान १० बजेसम्ममा १० लाख ८६ हजार ३४२ जनाले १ करोड २१ लाख ७९ हजार ४०० कित्ता बराबरको १ अर्ब २१ करोड ७९ लाख ४० हजार रुपैयाँ बराबरको आवेदन दिएका छन् । यो मागभन्दा ९८.६९ गुणा बढी आवेदन हो ।

कम्पनीले भदौ ८ गतेबाट जारी पूँजी ४ करोड रुपैयाँको प्रतिशेयर १०० रुपैयाँ अंकित मूल्यका १ करोड ३२ लाख रुपैयाँ बराबरको १ लाख ३२ हजार कित्ता आईपीओ जारी गरेको हो । लघुवित्तले निष्कासन गर्न लागेको कुल शेयरमध्ये जारी पूँजीको ०.५ प्रतिशत अर्थात २ हजार कित्ता कर्मचारीहरुका लागि र सर्वसाधारणका लागि छुट्याइएको शेयरमध्ये ५ प्रतिशत अर्थात ६ हजार ६०० कित्ता शेयर सामूहिक लगानी कोषहरुलाई सुरक्षित गरिएको छ भने बाँकी रहेको १ लाख २३ हजार ४०० कित्ता शेयरका लागि सर्वसाधारणले आवेदन दिन सक्नेछन् ।

उक्त आइपीओमा भदौ १२ गतेसम्म आवेदन दिन सकिने छ भने सो अवधिसम्म माग बमोजिम आवेदन नपरेमा भदौ २२ गतेसम्म आवेदन दिने समय थप हुनेछ । लगानीकर्ताले न्यूनतम १० कित्तादेखि १ हजार ३२० कित्तासम्मका लागि आवेदन दिन सक्नेछन् । आईपीओ निष्कासन तथा विक्री प्रवन्धकमा प्रभु क्यापिटल लिमिटेड रहेको छ ।

इच्छुक आवेदकले मेरो शेयर वेबसाइट तथा एप मार्फत आवेदन दिन सक्नेछन् । यसका साथै, नेपाल धितोपत्र बोर्डबाट अनुमति लिइ सी–आस्वा सेवामा सहभागी बैंक तथा वित्तीय संस्थाहरुबाट आवेदन दिन सक्नेछन् ।