स्ट्याण्डर्ड चार्टर्ड बैंकले ऋणपत्रमा आवेदन दिने आज अन्तिम दिन
काठमाडौं। स्ट्याण्डर्ड चार्टर्ड बैंकले पाँच वर्षे अवधिको ऋणपत्रमा आवेदन दिने आज (फागुन ८ गते) अन्तिम दिन रहेको छ । बैंकले माघ २६ गतेदेखि १०.३० प्रतिशत ब्याजदरको ऋणपत्र निष्कासन गरेको हो ।
कम्पनीले प्रतिऋणपत्र १ हजार रुपैयाँ अंकित मूल्यको २४ लाख कित्ताले हुन आउने २ अर्ब ४० करोड बराबरको ऋणपत्र विक्री गरेको छ। जसमा ६० प्रतिशत अर्थात् १४ लाख ४० हजार कित्ता ऋणपत्र व्यक्तिगत तवरबाट विक्री गरिने र ४० प्रतिशत ऋणपत्र सर्वसाधारणमा विक्री गरिने कम्पनीले बताएको छ । सर्वसाधारणमा विक्री गरिने ९ लाख ६० हजार कित्ता ऋणपत्रमध्ये ५ प्रतिशत अर्थात् ४८ हजार कित्ता सामूहिक लगानीकोषका लागि बाँडफाँट गरिएको छ ।
लगानीकर्ताले न्यूनतम २५ कित्तादेखि अधिकतम १ लाख कित्तासम्म माग गर्दै ऋणपत्र खरीदका लागि आवेदन दिन सक्नेछन् । उक्त ऋणपत्र विक्री प्रबन्धकमा एनआईबिएल एस क्यापिटल लिमिटेड रहेको छ । विक्री प्रबन्धकसँगै सम्पूर्ण सि–आस्बा सदस्य बैंक तथा वित्तीय संस्था र तीनका शाखाकार्यालयबाट ऋणपत्र खरीदका लागि आवेदन दिन सकिनेछ । साथै मेरो शेयर सफ्टवेयर र एपमार्फत पनि आवेदन दिन सकिने व्यवस्था छ ।
