चुलिँदै व्यापार घाटाः ११ महिनामा १६ खर्ब ४४ अर्बकाे आयात २ खर्ब ४७ अर्बकाे निर्यात
काठमाडाैं । चालु आर्थिक वर्ष २०८१/८२ काे ११ महिनामा १६ खर्ब ४४ अर्ब ७९ कराे ७५ लाख ८६ रूपैयाँ बरावरकाे वस्तु आयात भएकाे छ भने २ खर्ब ४७ अर्ब ५७ कराेड २ लाख १३ हजार रूपैयाँ बराबरको वस्तु निर्यात भएको छ।
भन्सार विभागकाे तथ्यांक अनुसार २०८१ साउन महिनादेखि २०८२ जेठसम्मको अवधिमा आयात १३.१५ प्रतिशत र निर्यात ७७.७७ प्रतिशतले बढेकाे छ । आयातको अनुपातमा निकै कम निर्यात हुने गरे पनि पछिल्लो ७ महिनादेखि निर्यातमा उच्च वृद्धि छ।
यस अवधिमा नेपालकाे वैदेशिक व्यापार १८.८० प्रतिशतले बढेर १८ खर्ब ९२ अर्ब ३६ कराेड ७७ लाख ९९ हजार रूपैयाँ पुगेकाे छ।
चालु आर्थिक वर्षको ११ महिनासम्ममा नेपालको व्यापार घाटा १३ खर्ब ९७ अर्ब २२ कराेड ७३ लाख ७३ हजार पुगेकाे छ । गत वर्षको यसै अवधिको तुलनामा व्यापार घाटा ६.३० प्रतिशतले बढेको हो । गत वर्षको सोही अवधिमा १३ खर्ब १४ अर्ब ४४ करोड १८ लाख रुपैयाँ बराबरको व्यापार घाटा भएको थियो ।
तथ्यांकअनुसार चालु आर्थिक वर्षको जेठ मसान्तसम्म सबैभन्दा बढी एक खर्ब १५ अर्ब ५५ करोड एक लाख ७१ हजार रुपैयाँ बराबरको डिजेल आयात भएको छ ।
दोस्रोमा सोयाबिन तेलको कच्चा पदार्थ ९५ अर्ब ७२ करोड ६१ लाख ५२ हजार रुपैयाँ बराबरको आयात भएको छ भने तेस्राेमा पेट्राेल र चाैथाेमा ग्यास आयात भएको छ।
समीक्षा अवधिमा नेपालबाट सबैभन्दा धेरै मूल्य बराबरको सोयाबिन तेल र सो सँग सम्बन्धित सामग्रीको निर्यात भएको छ। विभागको तथ्यांक अनुसार सो अवधिमा नेपालबाट ९३ अर्ब ५१ करोड ७१ लाख ८१ हजार रुपैयाँ बराबरको सोयाबिन तेल र त्यसका छोक्राको निर्यात भएको हो।
त्यस्तै, सो अवधिमा ११ अर्ब ३३ करोड ८९ लाख ८३ हजार रुपैयाँ बराबरको सूर्यमुखी तेल र ९ अर्ब ७८ करोड १० लाख १८ हजार रुपैयाँ बराबरको कार्पेट तथा टेक्सटाइल निर्यात भएको छ।
