सेयर बजारमा दोहोरो अंकको गिरावट, कारोबार रकम पनि घट्यो
काठमाडौं । तिहारलाई सेयर बजारले नकरात्मक स्वागत गरेको छ । तिहार अघिको अन्तिम कारोबार दिन बजार दोहोरो अंकले घटेको छ ।
उक्त दिन बजार १४.४३ अंकले घटेको छ । मंगलबार एकैदिन ४६ अंकले वृद्धि भएको थियो । सोमबार र मंगलबार एकैदिन उच्च अंकले वृद्धि भएको बजार आज ब्रेक लागेको छ ।
आज बजार परिसूचक २ हजार ६७७.६२ अंकको बिन्दुमा पुगेर बन्द भएको छ । उक्त दिन होटल तथा पर्यटन समूह १६७.६७ अंक, निर्जीवन बीमा समूह ६५.४२ र व्यापार समूह ११.५२ अंकले वृद्धि भएको छ । यी बाहेकका अन्य समूह भने राताम्य बनेका छन् ।
आज कारोबार रकममा पनि गिरावट आएको छ । मंगलबार ६ अर्ब माथिको कारोबार भएको थियो । तर, आज भने घटेर ५ अर्ब ९५ करोड ३९ लाख रुपैयाँ बराबरको सेयर किनबेच भएको छ ।
