टंकप्रसाद पाण्डेय बने कृषि विकास बैंकको नयाँ अध्यक्ष, गभर्नरसमक्ष लिए सपथ
निजामती सेवामा साढे दुई दशक लामो अनुभव सँगालेका पाण्डेयले बालुवाटारस्थित नेपाल राष्ट्र बैंकको केन्द्रीय कार्यालयमा पद तथा गोपनीयताको सपथ लिएका छन्।
काठमाडौँ । कृषि विकास बैंकको नेतृत्व सम्हाल्ने जिम्मेवारी टंकप्रसाद पाण्डेयले पाएका छन्। बैंकको सञ्चालक समितिले उनलाई संस्थाको नयाँ अध्यक्ष पदमा चयन गर्ने निर्णय गरेको हो।
नवनियुक्त अध्यक्ष पाण्डेयसँग सरकारी सेवामा झण्डै २५ वर्ष काम गरेको लामो र विशिष्ट अनुभव छ। आफ्नो निजामती सेवाको अवधिमा उनले देशको आर्थिक क्षेत्र लगायत विभिन्न महत्त्वपूर्ण सरकारी निकायहरूमा बसेर कुशलतापूर्वक कार्य सम्पादन गरिसकेका छन्।
अहिले पनि टंक अर्थ मन्त्रालयका कर्मचारी हुन् । उनी यतिबेला मन्त्रालयको प्रशासन महाशाखा प्रमुख छन् । अर्थ मन्त्रालयमा रहेका सहसचिवहरुमध्ये उनी बरिष्ठताका आधारमा दोस्रो स्थानमा पर्छन् ।
प्रचलित बैंक तथा वित्तीय संस्था सम्बन्धी कानुनी व्यवस्था अनुसार नवविवाचित वा नियुक्त अध्यक्षले नेपाल राष्ट्र बैंकका गभर्नरसमक्ष सपथ लिनुपर्ने प्रावधान रहेको छ।
सोही नियम अनुसार पाण्डेयले राजधानीको बालुवाटारस्थित राष्ट्र बैंकको मुख्यालयमा आयोजित एक विशेष समारोहका बीच आफ्नो पद तथा गोपनीयताको सपथ लिएका हुन्। उनलाई राष्ट्र बैंकका गभर्नर विश्वनाथ पौडेलले सपथ गराएका थिए।
उक्त सपथ ग्रहण समारोहमा मुलुकको केन्द्रीय बैंक र कृषि विकास बैंकका उच्च अधिकारीहरूको बाक्लो उपस्थिति रहेको थियो। कार्यक्रममा राष्ट्र बैंकका डेपुटी गभर्नर किरण पण्डित, कार्यकारी निर्देशकहरू रामु पौडेल, गुरुप्रसाद पौडेल, दीर्घबहादुर रावल र मुक्तिनाथ सापकोटा सहभागी भए।
त्यसैगरी राष्ट्र बैंककी निर्देशक मीरा ताल्चाभडेल र बोर्ड सचिव शरणकुमार अधिकारीको पनि उपस्थिति थियो। नयाँ अध्यक्षलाई बधाई दिन कृषि विकास बैंकका प्रमुख कार्यकारी अधिकृत गोविन्द गुरुङ तथा कम्पनी सचिव एवं प्रवक्ता हिमलाल पौडेल लगायतका जिम्मेवार अधिकारीहरू बालुवाटार पुगेका थिए।
