मन्दीमै उद्योग र निर्माण क्षेत्र, यो वर्ष पनि वृद्धिदर ऋणात्मक हुने अनुमान

अर्थ पथ

प्रकाशित मिति : १९ बैशाख २०८१, बुधबार

काठमाडौं । यो वर्ष पनि उद्योग र निर्माण क्षेत्र सुखद नहुने देखिएको छ । केन्द्रिय तथ्याङ्क कार्यालयले सार्वजनिक गरेको एक प्रतिवेदनले यस्तो देखाएको हो । कार्यालयका अनुसार चालु आर्थिक वर्षमा उद्योग र निर्माण क्षेत्रमा मन्दी कायमै रहने अनुमान गरिएको छ ।

चालु आर्थिक वर्षमा निर्माण क्षेत्रको वृद्धिदर २.०७ प्रतिशत ऋणात्मक हुने भएको छ । निर्माण सामाग्रीको आयातमा आएको कमी, निर्माण सामाग्रीको स्वदेशी उत्पादनमा भएको कमी जस्ता कारणले चालु आर्थिक वर्षमा यस क्षेत्रको मूल्य अभिवृद्धिमा संकुचन हुने अनुमान गरिएको हो ।

गत आव २०७९/८० मा यस क्षेत्रको वृद्धिदर ऋणात्मक (–१.१० प्रतिशत) रहने संशोधित अनुमान गरिएको थियो । अघिल्लो वर्ष २०७८/७९ को अन्तिम तथ्याङ्क अनुसार उक्त वर्षमा यस क्षेत्रको वृद्धिदर ६.९३ प्रतिशत कायम गरिएको थियो ।

यता, यो वर्ष उद्योग क्षेत्रको मूल्य अभिवृद्धि वृद्धिदर ऋणात्मक पनि अनुमान कार्यालयको छ । यो वर्ष यस क्षेत्रको वृद्धिदर १.६० प्रतिशत ऋणात्मक हुने प्रारम्भिक अनुमान गरिएको हो । निर्माण तथा व्यापार क्षेत्रमा सुधार हुन नसक्दा वस्तु तथा सेवाको समग्र मागमा कमी आएका कारण उत्पादनमूलक उद्योगले पूर्ण क्षमतामा उत्पादन गर्न नसकेकोले यो क्षेत्रको वृद्धिदर ऋणात्मक हुने कार्यालयको अनुमान छ ।

साथै, पछिल्लो समयमा अर्थतन्त्रमा सिर्जित विभिन्न प्रतिकुल कारणले विश्वव्यापी रूपमा नै अर्थतन्त्रमा उल्लेख्य सुधार आउन नसकेको अवस्थामा नेपालका उद्योगहरूको उत्पादनमा समेत संकुचन देखापर्ने अनुमान गरिएको हो।

गत आर्थिक वर्ष २०७९/८० मा यस क्षेत्रको वृद्धिदर ऋणात्मक (–१.९८%) रहने संशोधित अनुमान गरिएको छ। आर्थिक वर्ष २०७८/७९ को अन्तिम तथ्याङ्क अनुसार उक्त वर्षमा यस क्षेत्रको वृद्धिदर ६.७० प्रतिशत कायम गरिएको छ।

गत आर्थिक वर्ष २०७९/८० मा यस क्षेत्रको वृद्धिदर ऋणात्मक (–१.९८ प्रतिशत) रहने संशोधित अनुमान गरिएको छ। आर्थिक वर्ष २०७८/७९ को अन्तिम तथ्याङ्क अनुसार उक्त वर्षमा यस क्षेत्रको वृद्धिदर ६.७० प्रतिशत कायम गरिएको थियो ।