‘देशको अर्थतन्त्र चलयमान र ब्यापार घाटा कम गर्ने ब्याजदर नियन्त्रण जरुरी’

काठमाडौं । नेपाल इटाली उद्योग बाणिज्य संघको नवौं वार्षिक साधारण सभा सम्पन्न भएको छ । नेपाल र मित्रराष्ट्र इटालीबीच बढ्दो व्यापार व्यवसायलाई थप व्यवस्थित गर्दै लगानी तथा पर्यटन क्षेत्रलाई फराकिलो बनाउने उद्देश्यका साथ यो कार्यक्रमको आयोजना गरिएको हो ।

कार्यक्रमा बोल्ने अधिकांशले ब्याजदरलाई मुख्य केन्द्र बनाएका थिए । देशको अर्थतन्त्र चलयमान बनाउन ब्याजदर कम गर्ने आवश्यक रहेको अभिब्यत्ति दिएका थिए भने ब्यापार घाटा निरन्तणमा सरकारले पहल गर्नु पर्ने भनाइ राखेका थिए ।

कार्यक्रममा उपप्रधानमन्त्री नारायणकाजी श्रेष्ठले इटालीसँगको ब्यापार घाटा कम गर्नेका लागि सरकारले पर्यटनलाई मुख्य केन्द्र बनाएको बताए । अर्थतन्त्र चलयमान बनाउनका लागि ब्याजदर निरन्तण गर्ने सरकार छलफल मै रहेको र ठोस परिणम आउन नसकेको उनको भनाइ रहेको थियो ।

कार्यक्रममा नेपाल इटाली उद्योग वाणिज्य संघको नवौ वार्षिक साधारणसभामा कार्यवाहक अध्यक्ष ध्रुवकुमार श्रेष्ठले सरकारले राजदुतावास राखेर इटालीसँग सम्बन्ध समुधुर बनाउनु पर्ने भनाइ राखेका थिए । उनले भने “नेपालको सांस्कृतिक वस्तु सम्पदा र ऐतिहासिक सम्पदाको पुनर्निर्माणको क्षेत्रमा इटालीको योगदानप्रति हामी आभारी छौ र यो सहयोग हाम्रा दुई देशवीचको मित्रताको चिरस्थायी प्रतीकको रूपमा रहने छ भन्ने हाम्रो विश्वास रहेको छ । “

चेम्बर अफ कमर्सका अध्यक्ष राजेन्द्र मल्लले सरकारले ब्याजदर घटाउन नसक्दा ब्यवसायीहरु आफ्नो ब्यवसाय नै बन्द गर्नु पर्ने अवस्था आएको बताए । बेसरेटमा लाग्ने प्रिमियम २ प्रतिशत झार्ने सके ब्याजदर कम गर्ने सकिने उनको तर्फ रहेको थियो ।

नेपाल र इटालीबीच कुटनीतिक सम्बन्ध स्थापना भएको करिब साढे ६ दशक हुनै लागेको छ । सन् १९५९ अगस्ट ३१ मा दुई देशबीच कूटनीतिक सम्बन्ध स्थापना भएको थियो । यो अवधिमा दुई मुलुकबीचको सम्बन्ध सुमधुर रहेको र व्यापार व्यवसाय पनि उल्लेख्य नै रहेको परिदृश्यमा दुई मुलुकबीचको आर्थिक सम्बन्धलाई थप बलियो र सशक्त बनाउन नेपाल इटाली चेम्बर अफ कमर्स स्थापना भएको हो ।

कार्यक्रममा नेपाल इटाली उद्योग वाणिज्य क्षेत्रमा योगदान पुयाउनुभएका व्यक्ति तथा संस्थाहरुलाई सम्मान गरिएको थियो । जसमा विशेष सम्मान नेपाल इटाली चेम्बर अफ कमर्सका विशिष्ठ मानार्थ सदस्य राजेशकाजी श्रेष्ठलाई प्रदान गरिएको थियो । त्यस्तै, नेपाल र इटालीबीच व्यापार क्षेत्रमा उत्कृष्ट आयातकर्ताका रुपमा विनोद संगतानी लाई प्रदान गरिएको हो ।

इटालीतर्फ नेपाली वस्तु निर्यातको लागि उत्कृष्ठ निर्यातकर्ताको रुपमा सम्मान राजु श्रेष्ठलाई प्रदान गरिएको थियो । नेपाल इटली चेम्बर अफ कमर्सका तर्फबाट नेपालमा इटालीका पर्यटक सबैभन्दा बढी भित्र्याउन सफल भई पर्यटन क्षेत्रमा पुयाएको योगदान लागि पिस इन्टरनेशनल टुर एन्ड ट्राभल्सका प्रबन्ध निर्देशक सर्वोत्तम लाल श्रेष्ठलाई सम्मान प्रदान गरिएको थियो साथै फायर एण्ड आईस पिज्जेरियालाई उत्कृष्ट लगानीकर्ताको रुपमा सम्मान प्रदान गरियो ।

इटालीले नेपाललाई प्रत्यक्ष वा अप्रत्यक्ष रूपमा विकास सहयोग प्रदान गर्दै आएको छ । विशेषगरी सन् १९९० मा प्रजातन्त्र आएपछि इटालियन सरकार र जनताले नेपालमा सहयोगको मात्रा बढाउँदै लगेका छन् । यस्तै, सन् २०१५ को बिनाशकारी भूकम्पपछि पीडितलाई उल्लेख्य मात्रामा इटालियन सहयोग प्राप्त भएको छ । नेपाल इटली चेम्बरमार्फत द्विपक्षीय व्यापार अभिवृद्धिसँगै नेपालमा इटालीबाट लगानी भित्र्याउने तथा नेपालमा इटलीका पर्यटकको संख्या बढाउन अभिप्राय रहिआएको छ । नेपाल र इटालीबीचको सम्बन्ध मित्रता, आपसी हित र सौहार्दतामा आधारित छ ।