मुक्तिनाथ कृषि कम्पनीले मनायो छैठौं वार्षिक उत्सव, कृषिमा लगानी दशक सफल बनाउन कार्यपत्र प्रस्तुत
काठमाडौं । मुक्तिनाथ कृषि कम्पनीले स्थापनाको छैठौं वार्षिक उत्सव मनाएको छ । कम्पनीले शुक्रबार राजधानीको गैरीधारा-बालुवाटारस्थित सिल्भर ओक व्यकेंटमा एक कार्यक्रम गरी वार्षिक उत्सव मनाएको हो ।
वार्षिक उत्सवको अवसरमा कृषिमा लगानी दशक सफल बनाउन आवश्यक अध्ययनसहितको कार्यपत्र प्रस्तुत गरेको छ । ‘लगानी दशक सफल बनाउने जिम्मेवारी, सार्वजनिक नीजि सहकारीको साझेदारी’ भन्ने नारासहित कृषिमा लगानी दशकको कार्यपत्र प्रस्तुत गरिएको हो ।
कृषि उपजमा किसानले आफ्नो लगानीको प्रतिफल नपाउने गरेको, परिश्रमको मूल्यसमेत नपाउने लगायतकाा अवस्था सिर्जना भइरहेको अवस्थामा कृषि कम्पनीले कृषिमा लगानी दशक सफल बनाउन आवश्यक कार्यपत्र तयार गरेको कम्पनीले जनाएको छ ।
कृषि प्रधान देशका रुपमा चिनिने हाम्रो देशका खेतबारी चौतर्फी बाँझो देखिन्छन् । यस्तो अवस्थामा किसानको उत्पादन सिधै उपभोक्तामाझ पुराउने अभिलाषाका साथ छ वर्ष अघि स्थापना गरिएको मुक्तिनाथ कृषि कम्पनीको लक्ष्यले किसान र उपभोक्ता हित हुने विश्वास कम्पनीले राखेको छ ।
कार्यपत्रले गाँउको उत्पादन सहरमा, सहरको पुँजी गाउँमा भन्ने कुरालाई कम्पनीले विशेष जोड दिएको छ । कृषि उत्पादनलाई तीनै तहको सरकारसँग जोड्नुपर्नेमा कार्यक्रममा सहभागी बक्ताहरूको जोड थियो ।
कृषि तथा पशुपन्छी विकास मन्त्रि रामनाथ अधिकारीले स्वदेशी उत्पादनलाई निर्यात गर्नेगरी कार्यक्रम सञ्चालन गर्नुपर्ने बताए ।उनले सरकार र किसान बीचको खाडल पूर्ण निजीक्षेत्रको सक्रियता आवश्यक रहेको बताए । स्थानीय उत्पादनलाई प्रोत्साहन गर्न सरकार तयार रहेको समेत उनले बताए।
कार्यक्रममा बोल्दै राष्ट्रिय योजना आयोगका सदस्य जय बहादुर टन्डनले दिगो लक्ष्यहरू पूरा गर्न पनि कृषि क्षेत्रलाई अगाडि बढाउनुपर्ने बताए । मुलुकलाई समृद्धि र आत्मनिर्भर बनाउन कृषिजन्य क्षेत्रको विकास गर्नु अपरिहार्य रहेको उनले बताए ।
