बीवाईडीको नयाँ इलेक्ट्रिक सुपरकार ‘डेन्जा जेट’, २४ घण्टामै एक हजारभन्दा बढी बुकिङ

चिनियाँ गाडी निर्माता बीवाईडीको प्रिमियम ब्रान्ड डेन्जाले आफ्नो नयाँ इलेक्ट्रिक सुपरकार ‘डेन्जा जेट’ विश्व बजारमा सार्वजनिक गरेको २४ घण्टाभित्रै एक हजारभन्दा बढी बुकिङ पाएको छ।

काठमाडौँ । बीवाईडीको प्रिमियम ब्रान्ड डेन्जाले बेलायतमा आयोजित ‘गुडवुड फेस्टिभल अफ स्पिड’ मा आफ्नो नयाँ इलेक्ट्रिक सुपरकार ‘डेन्जा जेट’ आधिकारिक रूपमा सार्वजनिक गरेको छ।

जुलाई १३ तारिखदेखि चीनमा सुरु भएको यसको बुकिङ (प्रि-सेल) ले पहिलो २४ घण्टामै विश्वभरबाट १,००० भन्दा बढी अर्डर प्राप्त गर्न सफल भएको छ।

डेन्जा जेटलाई महँगो र विलासी गाडीको श्रेणीमा राखिएको छ। चीनको बजारका लागि यसको कुपे भर्सनको सुरुवाती मूल्य ६ लाख ८० हजार युआन (रु १ करोड ५२ लाख ३२ हजार) तोकिएको छ।

यस्तै, यसको स्पाइडर अर्थात् कन्भर्टिबल भर्सनको मूल्य ७ लाख ८० हजार युआन (रु १ करोड ७४ लाख ७२ हजार) र रेसिङ भर्सनको मूल्य ११ लाख ८० हजार युआन (रु २ करोड ६४ लाख ३२ हजार) कायम गरिएको छ।

यसको विपरीत युरोपेली बजारमा भने यो मोडलको सुरुवाती मूल्य करिब १ लाख ४२ हजार ९०० पाउन्ड (रू. २ करोड ९४ लाख ९० हजार) तोकिएको छ।

यो सुपर-कारमा तीनवटा मोटर जडित ड्राइभ प्रणाली रहेको छ, जसले संयुक्त रूपमा १,१८० किलोवाट (१,५८२ हर्सपावर) शक्ति पैदा गर्छ। यसको रेसिङ भर्सनले मात्र १.९६ सेकेन्डमा शून्यदेखि १०० किलोमिटर प्रतिघण्टाको गति समात्न सक्छ भने यसको उच्च गति प्रतिघण्टा ३५० किलोमिटर रहेको छ।

प्रविधि र डिजाइन

डेन्जा जेटमा विश्वमै पहिलो पटक प्रयोग गरिएका तीनवटा अत्याधुनिक प्रविधिहरू समावेश छन्। यो गाडी ‘ई-थ्री’ प्लेटफर्ममा आधारित पहिलो इलेक्ट्रिक सुपरकार हो, जसले गाडीका चारै वटा पाङ्ग्रामा आवश्यकता अनुसार शक्ति (टर्क) वितरण गर्न मद्दत गर्छ।

त्यसैगरी, यसमा विश्वमै पहिलो पटक ‘डिसस-एम’ सस्पेन्सन प्रणाली प्रयोग गरिएको छ, जसले १० मिलिसेकेन्डभन्दा कम समयमै सडकको अवस्था अनुसार प्रतिक्रिया जनाउन सक्छ।

यसमा १५ वटा प्रणाली एकीकृत गरिएको विद्युतीय ड्राइभ युनिट र दोस्रो पुस्ताको ‘सीटीबी ब्लेड ब्याट्री’ जडान गरिएको छ। यसले १५०० किलोवाटको उच्च क्षमतामा चार्ज गर्दै मात्र ५ मिनेटमा १० प्रतिशतबाट ७० प्रतिशतसम्म ब्याट्री चार्ज गर्न सक्छ।

बीवाईडीका विश्वव्यापी डिजाइन निर्देशक वुल्फग्याङ एगरको नेतृत्वमा तयार पारिएको यस गाडीमा ‘प्योर इमोसन’ डिजाइन शैली अपनाइएको छ।

यसको बनावट होचो र चौडा छ भने हावाको अवरोध कम गर्न कार्बन फाइबरका किटहरू प्रयोग गरिएको छ। डेन्जाले यसै वर्षको शरद ऋतुमा आफ्नो उत्कृष्ट ल्याप रेकर्ड कायम गर्ने प्रयासका लागि यो कारलाई जर्मनीको प्रसिद्ध ‘न्युबर्गरिङ नोर्डस्लाइफ’ ट्र्याकमा लैजाने घोषणा समेत गरेको छ।

बीवाईडीको विश्वव्यापी विस्तार रणनीति

गुडवुड फेस्टिभल अफ स्पिडमा सञ्चारमाध्यम ‘द पेपर’ सँग कुरा गर्दै बीवाईडीकी कार्यकारी उपाध्यक्ष स्टेला लीले कम्पनी साधारण निर्यातभन्दा माथि उठेर विश्वव्यापी ब्रान्ड पहिचान बनाउने दिशामा अघि बढिरहेको बताएकी छन्।

आफ्नो अन्तर्राष्ट्रिय बजार विस्तारलाई सहयोग पुर्‍याउन बीवाईडीले चार्जिङ पूर्वाधार पनि बढाउँदै लगेको छ। कम्पनीले सन् २०२६ को मार्चदेखि २०२७ को मार्च महिनाको बीचमा विदेशमा ६ हजार वटा द्रुत चार्जिङ (फ्ल्याश-चार्जिङ) स्टेशनहरू निर्माण गर्ने योजना बनाएको छ।

जसमा ३ हजार वटा युरोपमा, २ हजार वटा अमेरिकामा र १ हजार वटा एसिया-प्रशान्त क्षेत्रमा स्थापना गरिने छन्।

सन् २०२६ को पहिलो ६ महिनामा बीवाईडीको वैदेशिक बिक्री अघिल्लो वर्षको तुलनामा ६८ प्रतिशतले बढेर ७ लाख ८९ हजार ४०० युनिट पुगेको छ। यससँगै कम्पनीको कुल बिक्रीमा विदेशी बजारको हिस्सा ४० प्रतिशतभन्दा बढी भएको छ।