आजदेखि दशैँकाे लागी नयाँ नोट साट्न पाइने, कहाँबाट कसरी लिने ?
काठमाडौं । नेपाल राष्ट्र बैंकले आज (असोज ४ गते, सोमबार) देखि नयाँ नोट वितरण गर्ने भएको छ । केन्द्रीय बैैंकले एक सूचना जारी गर्दै यसपटकबाट वाणिज्य बैंकहरुका तोकिएका शाखाहरुबाट समेत नयाँ नोट वितरण गरिने भएको हो ।
दशैंका लागि आजबाट नयाँ नोट साट्न पाइने भएको हो । यसका लागि राष्ट्र बैंकले काठमाडौं उपत्यकाभित्र विभिन्न बाणिज्य बैंकलाई जिम्मा दिइएको छ ।
बाणिज्य बैंकहरुले नोट सटही गर्ने काउण्टरहरुको सूची भने बनिनसकेको राष्ट्र बैंकले जनाएको छ । काठमाडौं उपत्यका बाहिरका लागि भने राष्ट्र बैंककै प्रादेशिक कार्यालयहरुबाट पनि नोट सटहीको सुविधा पाउन सकिने छ । साथै बाणिज्य बैंकहरुले पनि राजधानी शहर बाहिरका क्षेत्रमा रहेका आफ्ना निश्चित शाखा कार्यलयबाट नोट सटहीको सुविधा दिने छन् ।
अघिल्ला वर्षमा २० र १० रुपैयाँको नोट आंसिक रुपमा अभाव हुने गरेको थियो । यो वर्ष भने त्यस्तो समस्या नहुने राष्ट्र बैंकले बताएको छ ।
वाणिज्य बैंकहरुले वितरण गर्नका लागि ४ अर्ब रुपैयाँका नयाँ नोट लगिसेकेको राष्ट्र बैंकले जनाएको छ । बैंकहरुले प्रधान कार्यालय वा अन्य तोकिएका कार्यालयहरुबाट नयाँ नोट सटहीको सुविधा दिनेछन् ।
राष्ट्र बैंकले सोमबारदेखि बालुवाटार कार्यालय र प्रदेशस्थित ७ वटै प्रदेशका प्रादेशिक कार्यालयहरुबाट नयाँ नोट वितरण हुने जनाएको छ । यसका अलवा केही विकास बैंक र फाइनान्स कम्पनीहरु समेतले नयाँ नोट लगेको जनाएको छ ।
राष्ट्र बैंकले सर्वसाधरणका लागि ३० देखि ३५ अर्ब रुपैयाँ बराबरको नयाँ नोट वितरण गर्ने तयारी गरेको छ । जसमध्ये १२ देखि १५ अर्ब रुपैयाँसम्म ५, १०, २०, ५० र १ सय रुपैयाँको नोटहरु वितरण गर्ने तयारी राष्ट्र बैंकको छ । प्रतिव्यक्ति १८ हजार ५ सय रुपैयाँका दरले नयाँ नोट वितरण हुनेछ ।
