स्थायी कमिटी बैठकमा नेपालको आक्रोश
काठमाडौं । शुक्रबार बसेको नेपाल कम्युनिस्ट पार्टी (नेकपा) को स्थायी कमिटी बैठकमा विवाद भएको छ । बैठकमा पार्टी वरिष्ठ नेता माधव कुमार नेपाल लगायतका नेताहरुले विविध विषयहरुमा असन्तुष्टि जनाएका छन् ।
वरिष्ठ नेता नेपालले दुई अध्यक्षले परिमार्जन गरि ल्याएको प्रस्तावमा एक व्यक्ति एक पदको कुरा सम्बोधन नभएकोमा असन्तुष्टि जनाएका हुन् । साथै उनले प्रतिवेदनले पार्टीभित्रको कार्यविभाजनका विषयमा अस्पष्ट रहेकाले आक्रोश समेत व्यक्त गरेका छन् ।
बैठकमा वरिष्ठ नेता नेपालसहित ९ जना नेताहरुले आ–आफ्ना तर्कहरु प्रस्तुत गरेका थिए । देव गुरुङ, लिलामणी पौडेल, धनश्याम भुसाल, मातृका यादव, अष्ठलक्ष्मी शाक्य, भीम आचार्य, रघुजी पन्त लगायतले आफ्नो तर्क प्रस्तुत गर्दै पार्टीप्रतिको कार्यशैलीप्रति असन्तुष्टि जनाएका छन् ।
बैठक शुरु भएको केही समयपछि नै प्रधानमन्त्री समेत रहेका नेकपाका अध्यक्ष केपी शर्मा ओली बैठकबाट बाहिरिएका थिए । भने अर्का अध्यक्ष पुष्पकमल दाहाल प्रचण्डको एकल अध्यक्षमतामा बैठक बसेको थियो ।
गत साउन ३० गते नेकपाको आन्तरिक विवाद समाधानको लागि गठित कार्यदलले बुझाएको प्रतिवेदनको आधारमा दुई अध्यक्षले परिमार्जन गरी आज बैठकमा पेश गर्ने कार्यक्रम रहेको थियो ।
