असोजदेखि दुबई-पोखरा अन्तर्राष्ट्रिय उडान सुरु, फ्लाईदुबईले थाल्यो टिकट बुकिङ

काठमाडौँ । नेपालको पर्यटन राजधानी र दोस्रो ठूलो सहर पोखरालाई संयुक्त अरब इमिरेट्स (यूएई) सँग सिधै जोड्ने गरी फ्लाईदुबईले नयाँ उडानको घोषणा गरेको छ।

वायुसेवा कम्पनीका अनुसार आगामी असोज ७ गते (सेप्टेम्बर २३ तारिख) देखि दुबई अन्तर्राष्ट्रिय विमानस्थलबाट पोखरा अन्तर्राष्ट्रिय विमानस्थलका लागि दैनिक सिधा उडानहरू सञ्चालन हुनेछन्।

संयुक्त अरब इमिरेट्सबाट नेपालको यो नयाँ विमानस्थलमा उडान सेवा सुरु गर्ने फ्लाईदुबई पहिलो अन्तर्राष्ट्रिय वायुसेवा कम्पनी बन्ने भएको छ।

हिमालयको देश भनेर चिनिने नेपालको प्रमुख पर्यटकीय गन्तव्य पोखरा जान चाहने यात्रुहरूका लागि यो नयाँ हवाई मार्गले ठूलो सहजता थप्ने विश्वास कम्पनीले लिएको भन्दै फ्लाईदुबईले आफ्नो सामाजिक सञ्जालमा प्रचार सुरु गरिसकेको छ।

दुबई र पोखराबीच सिधा हवाई सम्पर्क स्थापित भएपछि पश्चिम एसिया र विश्वका अन्य देशबाट नेपाल आउने पर्यटकहरूका लागि नयाँ रोमाञ्चक यात्राको ढोका खुल्ने छ।

यो नयाँ रुटका लागि कम्पनीले आफ्नो आधिकारिक वेबसाइट फ्लाईदुबई डटकममार्फत टिकट बुकिङसमेत खुला गरिसकेको छ।