द्रुत चार्जिङ र शक्तिशाली मोटरसहित आउँदै लीपमोटर बी १० को ‘अपडेटेड भर्सन’
चिनियाँ इलेक्ट्रिक गाडी उत्पादक लीपमोटरले अत्याधुनिक प्रविधि, तीव्र चार्जिङ र शक्तिशाली मोटरसहित आफ्नो चर्चित एसयूभी बी १० को नयाँ संस्करण बजारमा ल्याउने अन्तिम तयारी गरेको छ।
काठमाडौँ । चिनियाँ विद्युतीय गाडी बजारमा तीव्र प्रतिस्पर्धा गरिरहेको स्टार्टअप कम्पनी लीपमोटरले आफ्नो लोकप्रिय एसयूभी बी १० लाई थप परिमार्जन गरेर बजारमा उतार्ने निश्चित भएको छ।
कम्पनीले सामाजिक सञ्जाल वेइभोमार्फत एक सन्देश जारी गर्दै नयाँ संस्करणको बी १० का लागि आधिकारिक रूपमा बुकिङ खुला गरिएको जानकारी दिएको छ।
चिनियाँ उपभोक्ताले मात्र १५ डलर जम्मा गरेर यो अत्याधुनिक गाडीको बुकिङ सुरक्षित गर्न सक्नेछन्।
सुरुवाती चरणमै बुकिङ गर्ने ग्राहकहरूलाई आकर्षित गर्न कम्पनीले विशेष उपहारको समेत व्यवस्था गरेको छ, जसमा १० हजार इनर्जी पोइन्ट्स, आफूलाई मनपर्ने बाहिरी रङ निःशुल्क रोज्न पाउने सुविधा र सबैभन्दा पहिले गाडी चलाएर हेर्ने अर्थात् टेस्ट ड्राइभको अवसर सामेल छ।
नयाँ बी १० लाई कम्पनीले केवल कस्मेटिक परिवर्तनमा मात्र सीमित नराखेर प्राविधिक रूपमा निकै बलियो बनाएको देखिन्छ।
यस पटकको सबैभन्दा ठूलो अपग्रेड यसको ८०० भोल्टको हाइ भोल्टेज आर्किटेक्चर हो। यो प्रविधिका कारण गाडीको चार्जिङ गति निकै तीव्र हुनेछ, जसले गर्दा मात्र १६ मिनेटको छोटो समयमा गाडीको ब्याट्री ३० प्रतिशतबाट बढेर ८० प्रतिशत पुग्ने दाबी कम्पनीको छ।
लामो यात्रा तय गर्न चाहनेहरूका लागि यो कार निकै उपयोगी हुने देखिएको छ, किनभने एक पटकको फुल चार्जमा यसले ६१० किलोमिटरसम्मको दुरी तय गर्न सक्छ।
यसका साथै नयाँ संस्करणमा सुरक्षा र प्रविधिलाई पनि विशेष ध्यान दिइएको छ। यसको माथिल्लो अर्थात् टप भेरियन्टमा स्मार्ट ड्राइभिङ अनुभवका लागि अत्याधुनिक लाइडार प्रविधि जडान गरिएको छ। गति र शक्तिका सोखिनहरूका लागि यस पटक मोटरको क्षमतामा पनि उल्लेख्य सुधार गरिएको छ।
पुराना मोडलहरूमा १३२ र १६० किलोवाटका मोटर उपलब्ध रहेकामा अब आउने नयाँ टप भेरियन्टमा १८० र १८५ किलोवाट क्षमताका शक्तिशाली मोटरहरू रहनेछन्। यो नयाँ इन्जिन क्षमतासँगै गाडीले प्रतिघण्टा १८० किलोमिटरसम्मको अधिकतम गति समात्न सक्नेछ।
लीपमोटरले यो नयाँ गाडी सार्वजनिक हुने मिति अहिलेसम्म गोप्य नै राखेको भए पनि बुकिङको प्रक्रिया सुरु भइसकेकाले आगामी महिनाभित्रै यो चिनियाँ सडकमा दौडिने अनुमान अटो क्षेत्रका जानकारहरूले गरेका छन्।
नेपाली बजारका लागि पनि यो सुखद खबर हुन सक्छ, किनभने लीपमोटर बी १० नेपालमा पहिलेदेखि नै बिक्री भइरहेको स्थापित मोडल हो। चीनमा यसको अपग्रेडेड भर्सन व्यावसायिक बिक्री सुरु हुनासाथ यो परिमार्जित र अत्याधुनिक एसयूभी नेपाली प्रविधिप्रेमी ग्राहकका लागि पनि भित्रिने बलियो सम्भावना देखिन्छ।
