मेटलाइफ नेपाल लगातार दोस्रो वर्ष ‘ग्रेट प्लेस टु वर्क’ प्रमाणपत्रबाट सम्मानित

काठमाडौं । मेटलाइफ नेपाल लगातार दोस्रो वर्ष ‘ग्रेट प्लेस टु वर्क’ प्रमाणपत्रबाट सम्मानित भएको छ। कर्मचारीहरूको प्रत्यक्ष प्रतिक्रियाका आधारमा प्रदान गरिने यो अन्तर्राष्ट्रिय मान्यताले मेटलाइफ नेपाललाई उत्कृष्ट कार्यस्थलका रूपमा पुनः स्थापित गरेको कम्पनीले जनाएको छ।

कम्पनीका अनुसार यस वर्ष ९१ प्रतिशत कर्मचारीहरूले मेटलाइफ नेपाललाई काम गर्नका लागि उत्कृष्ट कार्यस्थल भएको बताएका छन्।

ग्रेट प्लेस टु वर्क कार्यस्थलको संस्कृति, कर्मचारी अनुभव तथा संस्थागत नेतृत्वको मूल्यांकन गर्ने विश्वव्यापी संस्था हो। यसले संस्थाको व्यावसायिक सफलता, कर्मचारीलाई दीर्घकालसम्म संस्थामा आबद्ध राख्ने क्षमता तथा नवप्रवर्तनलाई प्रोत्साहन गर्ने कार्यसंस्कृतिको मूल्यांकन गर्छ।

ग्रेट प्लेस टु वर्ककी ग्लोबल रिकग्निसन उपाध्यक्ष सारा लेविस–कुलिनले लगातार दोस्रो वर्ष यो प्रमाणपत्र प्राप्त गर्नु मेटलाइफ नेपालको उल्लेखनीय उपलब्धि भएको बताइन्। उनका अनुसार यो मान्यता कर्मचारीहरूले आफ्नै संस्थाबारे दिएको वास्तविक र प्रत्यक्ष प्रतिक्रियाका आधारमा प्रदान गरिने आधिकारिक प्रमाणपत्र हो।

मेटलाइफ नेपालका महाप्रबन्धक निर्मल काजी श्रेष्ठले लगातार दोस्रो वर्ष यो मान्यता प्राप्त गर्नु कम्पनीका लागि गर्वको विषय भएको बताए। उनका अनुसार यो उपलब्धि कर्मचारीहरूको विश्वास, समर्पण र सहकार्यको परिणाम हो।

उनले प्रत्येक कर्मचारीले आफूलाई सम्मानित, सशक्त र आफ्नो पूर्ण क्षमता विकास गर्न सक्ने समावेशी तथा सकारात्मक कार्य वातावरण निर्माणमा कम्पनी निरन्तर प्रतिबद्ध रहेको उल्लेख गरे।

कम्पनीका अनुसार गत एक वर्षमा अत्याधुनिक प्रविधियुक्त मुख्य कार्यालय स्थापना गर्नुका साथै कर्मचारी स्वयंसेवा कार्यक्रम सञ्चालन गरेर कर्मचारी अनुभवलाई थप सुदृढ बनाइएको छ।

सर्वेक्षणअनुसार ९६ प्रतिशत कर्मचारीहरूले मेटलाइफ नेपाललाई शारीरिक रूपमा सुरक्षित कार्यस्थल मानेका छन् भने ९४ प्रतिशत कर्मचारीहरूले कम्पनीमा काम गर्न र समाजप्रति कम्पनीले गरेको योगदानप्रति गर्व महसुस गर्ने बताएका छन्।

ग्रेट प्लेस टु वर्कको अनुसन्धानअनुसार प्रमाणित संस्थामा कार्यरत कर्मचारीहरूले उत्कृष्ट नेतृत्व, निष्पक्ष पारिश्रमिक, पदोन्नतिको समान अवसर तथा कम्पनीको सफलताबाट लाभ प्राप्त गर्ने सम्भावना अन्य संस्थाको तुलनामा उल्लेखनीय रूपमा बढी हुने गरेको छ।

सन् १८६८ मा स्थापित मेटलाइफ विश्वका अग्रणी वित्तीय सेवा प्रदायक कम्पनीहरूमध्ये एक हो। कम्पनीले विश्वका ४० भन्दा बढी बजारमा जीवन बीमा, एन्युटी, कर्मचारी लाभ योजना तथा सम्पत्ति व्यवस्थापन सेवा प्रदान गर्दै आएको छ।

नेपालमा मेटलाइफले सन् २००१ देखि अमेरिकन लाइफ इन्स्योरेन्स कम्पनीको शाखामार्फत सेवा सञ्चालन गर्दै आएको छ। कम्पनीले जीवन बीमा, दुर्घटना तथा स्वास्थ्य बीमा र सामूहिक बीमा लगायतका सेवा प्रदान गर्दै आएको जनाएको छ।