ग्रीन भेन्चर्सको आईपीओ चैत्र २० गते बाँडफाँट हुने, २ लाख ८७ हजार ५ सय जनालाई १० कित्ता !
काठमाडौं । ग्रीन भेन्चर्स कम्पनी लिमिटेडले आईपीओ बाँडफाँट गर्ने मिति तय भएको छ । कम्पनीको आईपीओ बाँडफाँट चैत्र २० गते, आइतबार गरिने भएको हो । कम्पनीको आईपीओको प्रि–अलटमेन्टको काम सम्पन्न भईसकेकाले बाँडफाँट चैत्र २० गते गरिने आईपीओ निष्काशन तथा बिक्री प्रबन्धक लक्ष्मी क्यापिटलले जनाएको छ । तर कुन स्थान र कुन समयमा बाँडफाँट गरिने भनेर एकिन भइनसकेको क्यापिटलले जनाएको छ ।
कम्पनीले चैत्र ८ गतेदेखि चैत्र ११ गतेसम्म सर्वसाधारण लगानीकर्तालाई आईपीओ निष्काशन तथा बिक्री खुला गरेको थियो । कम्पनीले प्रतिकित्ता १०० रुपैयाँ अंकित दरका ३१ करोड २५ लाख रुपैयाँ बराबरको ३१ लाख २५ हजार ७५० कित्ता आईपीओ निष्काशन गरेको थियो । जसमध्ये ३ प्रतिशत अर्थात ९३ हजार ७५० कित्ता शेयर कर्मचारीहरुका लागि, ५ प्रतिशत अर्थात १ लाख ५६ हजार २५० कित्ता शेयर सामूहिक लगानी कोषका लागि र २८ लाख ७५ हजार कित्ता शेयर सर्वसाधारणका लागि छुट्याइएको थियो ।
कम्पनीको आईपीओमा अन्तिम दिनसम्ममा २१ लाख ५७ हजार ६३१ जना आवेदकले २ करोड ५९ लाख ४० हजार ५६० कित्ताका लागि आवेदन दिएका थिए ।
कम्पनीको आईपीओमा मागभन्दा बढी आवेदन परेकाले गोलप्रथा विधिबाट बाँडफाँट गरिनेछ । गोला प्रथा विधिबाट १० कित्ताका दरले बाँडफाँट गर्दा २ लाख ८७ हजार ५ सय जनाले मात्रै कम्पनीको आईपीओ प्राप्त गर्नेछन् । आवेदन दिएका झण्डै १९ लाख आवेदकको हात रित्तो हुने देखिन्छ ।
