एलजीले ‘एसेन्सियल सिरिज’ घरेलु उपकरण देशभर विस्तार गर्दै
काठमाडौं । एलजीले ‘हरेक घरको खुशी, घर–घरमा एलजी’ अभियानअन्तर्गत ‘एलजी एसेन्सियल सिरिज’का घरेलु उपकरण देशका प्रमुख सहरमा विस्तार गर्ने भएको छ।
कम्पनीका अनुसार काठमाडौंमा राष्ट्रिय शुभारम्भ गरेपछि इटहरी (असार १५), नारायणघाट (असार १७), पोखरा (असार १९), बुटवल (असार २१) र नेपालगञ्ज (असार २३) मा विशेष कार्यक्रम आयोजना गरिनेछ। ती कार्यक्रममा उपभोक्ताले नयाँ उत्पादनको प्रत्यक्ष अवलोकन गर्न, विशेषताबारे जानकारी लिन तथा आफ्ना आवश्यकताअनुसार उपयुक्त उपकरण छनोट गर्न सक्नेछन्।
एलजी इलेक्ट्रोनिक्स सिङ्गापुर प्रालिले नेपालका आधिकारिक वितरक सीजी इलेक्ट्रोनिक्ससँगको सहकार्यमा नेपाली उपभोक्ताको आवश्यकता र जीवनशैलीलाई लक्षित गर्दै ‘एलजी एसेन्सियल सिरिज’ सार्वजनिक गरेको हो। काठमाडौंस्थित विवान्ता होटलमा आयोजित कार्यक्रममा उक्त श्रृंखलाको औपचारिक अनावरण गरिएको थियो।
नयाँ श्रृंखलामा दुई ढोके रेफ्रिजेरेटर, पूर्ण स्वचालित माथिबाट कपडा हाल्ने धुने मेसिन तथा कोठा चिस्याउने एयर कन्डिसनर समावेश छन्।
दुई ढोके रेफ्रिजेरेटरमा बरफ आफैं पगाल्ने प्रविधि, स्मार्ट सञ्चालन प्रणाली तथा अघिल्ला मोडेलको तुलनामा २० प्रतिशत बढी तरकारी भण्डारण क्षमता रहेको कम्पनीले जनाएको छ।
पूर्ण स्वचालित धुने मेसिनमा सुरक्षित मोटर, विशेष आवरण, पानी प्रतिरोधी नियन्त्रण प्यानल तथा कम पानीको चापमा पनि प्रभावकारी रूपमा कपडा धुने प्रविधि समावेश गरिएको कम्पनीको भनाइ छ।
एयर कन्डिसनरमा ऊर्जा–दक्ष प्रविधि, चिस्याउने तथा तताउने दुवै सुविधा, वातावरणमैत्री शीतलक ग्यास र कम ध्वनिमा सञ्चालन हुने विशेषता रहेको जनाइएको छ। कम्पनीका अनुसार यसले परम्परागत नन–इनभर्टर एयर कन्डिसनरको तुलनामा कम विद्युत् खपत गर्छ।
कम्पनीले ‘एलजी एसेन्सियल सिरिज’का उत्पादनहरू जुन २०२६ देखि नेपालभर बिक्री सुरु हुने जनाएको छ। प्रारम्भिक मोडेलको मूल्य ४९ हजार ६९० रुपैयाँबाट सुरु हुनेछ। उत्पादनहरू आधिकारिक एलजी ब्रान्ड पसल, बहुब्रान्ड बिक्री केन्द्र तथा प्रमुख विद्युतीय व्यापार मञ्चमार्फत उपलब्ध हुने कम्पनीले जनाएको छ।
